Ayera tardi, Partido Patriotico di Aruba “Transforma PPA” a haci un conferencia di prensa pa presenta su programacion di gobernacion na unda tambe nan a sigura cu nan kier ta fuerte den parlamento.

Den presencia di varios candidato hunto cu Lisette Malmberg lider di e partido aki, a trece dilanti cu esaki ta un programa di gobernacion cu mester di un proceso hopi serio, el a splica cu nan a bay den un proceso inclusivo y participatorio na unda cu mas di 16 grupo a traha hunto cu nan riba diferente aspecto di e programa.

El a papia riba 7 punto di enfoke cu nan tin cu ta gobierno y liderazgo, famia y comunidad, recursonan nacional, desaroyo economico, maneho financiero, educacion, tambe husticia y paz, segun Malmberg a menciona, den e 7 area aki por mira e 7 principio y por mira e puntonan di atencion cu PPA ta duna na esey.

Tambe el a splica kico ta e diferente structura actual den tur diferente area y con nan ta mira gobernacion asina como tambe ki plan nan lo kier ehecuta.

“No ta posibel pa nos sigui cu e mesun structura y sistema di gobernacion, tin speransa di tin un diferente resultado” Malberg a sigura.

Loke nan ta destaca den plan ta e palabra ‘Reforma’ cu el a menciona cu esey nan kier mira den structura di goberna, reforma den e diferente sistemanan, tambe el a informa cu diferente personanan di departamentonan di gobierno a traha hunto cu nan pa por tin tur informacion di tur e documento cu nan por a ricibi.

“En realidad Aruba tin hopi plan y proyecto pero sinembargo tabata falta e boluntad politico of e hecho pa por ehecuta e plannan aki”, Malmberg a comenta.

Nan enfoke ta pa ehecuta un mehora den e sistema di structura di goberna y esey ta den e henter e plan di gobernacion cu nan a presenta di 60 pagina cu ta disponibel riba nan website www.transformaruba.com.

Mirando cu Aruba tin hopi problemanan social como por ehemplo Abuso Sexual di Mucha y Salud Mental, Bon Dia Aruba a puntra kico ta nan plan tocante e dos problematica aki, Malmberg a contesta cu nan ta bin cu un ministerio nobo denomina “Ministerio di Famia y Comunidad” na unda nan ta mira e aspecto di salubridad publico, sociale zaken, cuido y proteccion di mucha, desaroyo di hobennan y otro asuntonan cu ta importante.

“Nos vision ta cu nos mester ta mas cerca cu e diferente servicionan aki na unda nos hendenan ta, den e bario cu diferente servicionan di e prome linea, e mester bira disponibel, den e programa por mira cu ta bay tin un restructuracion di full e aspectonan aki”.

Asina mes, el a sigura cu Aruba a wordo maneha e ultimo tempo den area aki a traves di e Social Crisis Plan pero sinembargo, nan como PPA no por keda den e ‘Crisis Mode’ ta yega un momento caminda cu e Social Crisis Plan tabata supone di actualisa e diferente atraso cu tabata existi den diferente aspecto di servicio, haci mehora “mi ta kere un tremendo trabou a wordo haci den dje, sinembargo, ainda tin aspectonan cu por wordo mehora y structura”, el a afirma.

Di otro banda, Malmberg a trece dilanti cu nunca su persona a bisa cu “e no lo traha cu ni un partido”, el a sigura cu nan lo bay traha cu tur partido, pa motibo cu nan a yega na un punto caminda cu e nacion tin cu traha riba su futuro.

“Sinembargo, tin un diferencia entre traha cu goberna, pa bo goberna bo tin cu tin un vision comparti, bo mester tin balornan comparti, si esey no ta e caso, e ora ey bo ta mira den nos historia cuanto coalicion no a dura, pasobra na final nan no por a cana cu otro y esey nos ta bisa cu nos kier cuida di esey, nos ta kere den un reforma interno, prome cu bo traha den cas di pueblo bo tin cu drecha bo mesun cas y cu tin aspectonan den e partidonan tradicional cu mester wordo coregi y mester wordo drecha”, el a afirma.

Asina mes, el a bisa cu nan ta prefera di ta fuerte den parlamento y tuma un posicion di oposicion real caminda nan ta trece e cambio y e leynan cu nan kier mira a traves di e asientonan cu nan lo por representa pueblo cune, y nan por duna un bon ehemplo den e posicion ey.