Maneho di Fundacion Parke Nacional Aruba ta den shock cu un biaha mas a destrui un parti importante pa naturalesa di Aruba. Bon Dia Aruba a tuma contacto cu Natasha Silva di Fundacion Parke Nacional Aruba riba e caso di rosamento di un tereno na Sero Alejandro cu den e prome Plan di Ordenanza Teritorial, e ROP di 2009 pa 2019, tabata cay den e asina yama bufferzone di Parke Nacional Arikok.

Na 2019, a pesar di varios protesta di instancianan y ngo’s, a kita e bufferzone rond di cu antes tabata gosa di e tereno como ‘buffer’ pa e parke nacional. Desde cu a lanta Parke Nacional Arikok e tabatin su zona di transicion, esta e bufferzone pa asina sigura cu e tereno reserva pa conservacion realmente ta e espacio asigna. “Un animal, un mata no sa cua ta tereno protegi of no. Nan ta crusa di un tereno pa otro. Na momento cu kita e zona di transicion, de facto ta haci Parke Nacional Arikok mas chikito,” Silva a bisa Bon Dia Aruba. Pero no obstante e argumento aki, no solamente di FPNA, Gobierno a instrui cu e ROP di 2019-2029 mester keda sin e bufferzone y e zona ta bira uno rural.

Consecuentemente, e reaccion di Silva tabata di sorpresa (desagradabel). Es mas, e tabata spanta pa e rosamento indiscrimina den un area cu ta conoci pa e personal di parke. “Mi sa cu e reglanan pa terenonan di e grandura aki ta cu Direccion Naturalesa y Medioambiente, DNM mester bin controla pa su maneho di Build with Nature. Y ta riba nan conseho, DIP ta duna e aanlegvergunning of no,” Silva a splica.

Mondi tin hopi balor

Pa Silva, e informacion tabata realmente un mal noticia. “Esaki ta devastador, ya cu hopi na Aruba ta pensa cu mondi ta algo cu no tin balor. Pero esey ta un pensamento eroneo. Mondi tin masha balor natural mes,” Natasha Silva a sigui splica. “E area specifico di Sero Alejandro tabata considera di gran balor natural pa esnan cu ta biba na Savaneta y ta stima naturalesa. Nan ta hendenan cu tin decadanan ta biba den y cu naturalesa.”

Dato concreto di balor natural perdi

Parke Nacional Arikok tin dato concreto di e rikesa natural di e area, mirando cu un tempo e tabata cay como parti di e totalidad di area protegi. “Nos sa cu e area tabata contene flora y fauna endemico, tabata un refugio pa Shoco y Prikichi. E tabata tambe e cas pa cascabel, e cododo, y e raton endemico di Aruba, e Hummelinck’s Vesper Mouse. Pero tambe tabatin coneu, dragonflies (helicopter) y hasta raton di anochi cu ta percura pa e proceso di polinacion.”

Natasha Silva ta lamenta cu Gobierno no a duna oportunidad pa laga e area berdad bira un museo aire habri dirigi riba historia di agricultura di Aruba y di e herencia cultural di aloë.

“Mi ta compronde cu tin un presion pa cas na Aruba, pero un proyecto di preservacion natural y historico lo a yuda preserva identidad di Aruba y crea conscientisacion, mientras cu ta conserva naturalesa.”

E Gerente di FPNA a bisa cu realmente ta ora pa Aruba inventa un balans nobo, cu su base bon hancra den conocemento di tradicion, ciencia y pensamento innovativo pa un futuro sostenibel. “Pasobra di otro forma nos ta perde tur locual ta haci Aruba unico y tur esaki ta sosodiendo caba na un velocidad alarmante,” ta e advertencia di Natasha Silva.