Segun resumen di ayera di Departamento di Salubridad Publico DVG, ayera por a nota un tasa di positividad excepcionalmente halto compara cu ultimo dianan.
Esaki despues cu e dia anterior, diasabra, e tasa di positividad (‘positivity rate’) tabata apenas 7% y riba diabierna 6%. Segun DVG, e cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 482 test. E tasa di positividad ta indica e porcentahe di test positivo cu a resulta entre tur test realisa entre residentenan di Aruba. Organisacion Mundial di Salud (WHO) ta recomenda pa mantene e tasa di positividad na 5%, ya cu esaki ta indica cu e cantidad di persona cu ta positivo sin sa ta uno minimo. Segun WHO, un tasa di positividad di 5% ta indica cu e pandemia ta bao control.
Ademas, den su resumen DVG a informa cu ayera tabatin 8 persona a recupera, mientras a registra un total di 16 caso nobo di Covid-19, di cual 4 no ta residente. E cantidad di caso activo tabata 64, mientras en cantidad di fayecido a keda na 107.
