Pildo ta demostra efectividad den cancer nan dificil di trata

(AP) – Un pildo ta demostrando cualidadnan cu ta yuda preveni plamamento di cancer di pecho den su prome etapanan despues di tratamento inicial.

E resultadonan a ser publica pa e American Society of Clinical Oncology prome cu nan reuninon anual den The New England Journal of Medicine.

E pildo aki yama Lynparza, ta mustra cu e ta yuda pashentnan cu tin cancer di pecho cu mutacion nan dañino biba pa un tempo mas largo sin enfermedad despues cu nan cancer a ser trata cu cirugia y/of kimoterapia.

A haci e estudio aki cu pashentnan cu tin mutacion den nan gen conoci pa e nomber BRCA1 y BRCA2 cual por pone hende den peliger di cancer di pecho si nan no funciona corectamente, pero cu no tin un defecto den nan gen cu por ser afecta pa e droga Herceptin. Mayoria di e pashentnan den e estudio tambe tabatin tumor cu no tabata acelera pa e hormonanan estrogen of progesterona. Cancer cu no ta acelera pa e dos hormonanan aki of e gen Herceptin ta yama “Tripel Negativo” y ta specialmente dificil pa trata.

E estudio nobo aki a test Lynarza den 1,836 hende muhe y homber cu enfermedad den un etapa temprano cu a ricibi e droga of pildo placebo pa uzo di un aña despues di cirugia y kimpoterapia. Casi 82% di e pashentnan tabatin cancer di pecho tripel-negativo. Monitornan independiente a conesha di publica e resultadonan despues di wak e beneficio nan claro di Lynarza. Despues di 3 aña, 86% di e pashentnan cu a uza e pildo aki tabata bibo sin cu e cancer bolbe bek compara cu 77% di e grupo cu a uza placebo.

Efectonan secundario serio no tabata mas ni menos compara cu otro pildonan. E efectonan secundario ta inclui anemia, fatiga y iregularidad den e cantidad di celulanan di sanger cora.

Lynparza, cual ta distribui pa AstraZeneca y Merck ya ta bendi na U.S y algun paisnan mas pa trata cancernan di pecho cu a plama caba y tambe pa trata otro cancernan manera cancer den ovario, prostata y pancreas. E ta costa mas o menos 14,000 dollar pa luna, aunke e costo cu e pashentnan ta paga for di nan mesun saco ta varia dependiendo di nan ingresonan, seguro, y algun otro factornan.