Entrega di lista di personanan cu derecho di voto ya no ta di e tempo aki

Duna partidonan politico e lista completo di personanan cu derecho di voto ya no ta di e tempo aki mas. Asina Presidente di Conseho Electoral dr. Glenn Thode a bisa Bon Dia Aruba. E reglanan ta bin di tempo cu no tabatin automatisacion, e tempo cu hende tabata por a bin vota dos biaha sin cu realmente por controla. “E por pasa dia eleccion ora hende ta cansa, of cu ta comete eror.”

Ta trata aki di reglanan di añanan 50 cu no tabatin computer, unda no solamente no por a saca tur dato mesora, pero pa traha copia, literalmente mester a hinca cada dato, cada nomber uno pa uno na man. “Ta trata di data cu mester a sea type of skirbi na man, cada biaha. Y por tin fout cu ta sosode e momento ey.”

Como tal, e sistema aki tabata rekeri hopi control, cu tabata rekeri tempo y material, ademas di hopi hende pa traha. “Awendia tin nos tin sistemanan automatisa cu ta certifica, cu ta duna e certeza cu e data ta corecto. E data cu ta den e sistema automatico ta mucho mas preciso cu esun cu hende mester copia na man. E certificacion ta duna un precision mas halto cu hende por logra. Den otro palabra, awor cu tin sistema automatisa y certifica no mester di e control manual mas.

“Hende por wel di bisa cu semper nos a haci esaki asina. Pero antes tambe tabatin sclavitud. Pues, e argumento cu ‘semper a haci’e asina’ no tin base. Mundo ta desaroya.”

Thode a bisa cu ademas locual ta mas importante ta cu data di hende por keda malusa den hopi forma, si no controla e uso. E ta bisto y evidente caba. Specialmente awor cu ta hinca e data personal ey den computer por procesa nan na manera cu antes, ora cu a traha e reglanan no tabata posibel. Si tuma e cantidad di data di ciudadano y duna un partido, kico ta bay haci cu nan? Nan por duna otro e informacion aki.”

Tratadonan ta proteha data personal

Pa tal motibo mes a bin cu reglanan cu no tabata existi antes y ta mara na tratadonan pa proteha data personal, particularmente contra maluso di esakinan. Pasobra tin experiencia rond mundo con a analisa e data los di e meta pa cual a acumula nan.

A puntra Presidente di Conseho Electoral si partidonan politico ta compronde cu tempo a cambia, y aki Thode a bisa cu mester puntra cada uno. Por lo menos un partido a haci peticion pa e registro completo. “Nos a ricibi un peticion pa e lista integral di personanan cu derecho di voto y awe, despues di e numeracion di listanan, nos lo trata e peticion aki y lo mester duna e lista integral,” Thode a bisa Bon Dia Aruba ayera, agregando si cu e lista lo ta sin e adres di e votadonan, manera cu Director di Censo Sharine Luidens a informa Parlamento. “Nos lo wak kico ta bay ta e reaccion di e partidonan cu ta pidi e lista y ta haya e data adapta aki. No ta e data cu nan ta sperando.”

Privacidad

Normanan moderno ta basa riba derechonan fundamental. Na 2018, tur compania grandi den comunicacion, for di Apple te Google, tabata colecta data. Na Mei di e aña ey, tur tabata manda notificacion pa usuarionan firma of acepta con nan ta usa e data. Motibo ta cu e tempo ey e normanan a cambia y a introduci un General Data Protection Regulation, cu a introduci den henter Union Europeo.

Y entretanto, e GDPR a bira e standard global. Ningun di e companianan por haci negoshi na Europa usando e data priva di nan usuarionan. Haci negoshi ta nifica intercambia data cu clientenan. Pa nan por a haci negoshi na Europa, nan mester a adapta y acepta e GDPR. Pues, e standard a bira cu no por duna otro hende data personal pa nan por usa nan pa otro meta pa cual motibo a acumula nan.

Kiesverordening ta anticua

E lista di personanan cu derecho di voto ta regula den articulo 10 di e Ley di Eleccion. Dr. Thode a bisa cu ta trata di un articulo anticua. St. Maarten no tin e articulo aki mas den su ley di Eleccion mientras cu islanan BES a tuma e ley Hulandes pa eleccion cu tampoco tin e stipulacion aki. “E articulo no ta cuadra mas cu e normanan di awendia.”

Sosten pa e peticion di drs. Greg Peterson

Den otro palabra, e partido cu pidi e lista di persona cu derecho di voto na Aruba ta sigui un practica anticua y no ta respeta e normanan moderno, unda mester respeta e derecho di privacidad di cada persona. Den e sentido aki, Glenn Thode ta sostene e protesta di drs. Greg Peterson, kende a manda un carta pa Prome Minister Evelyn Wever Croes pa pidi pa stop e practica aki.

“No ta Greg Peterson so ta preocupa. Despues di su carta, mi a haya diferente hende tuma contacto cu mi pa expresa nan preocupacion. Es mas, pa algun hende e tabata hasta un momento pa expresa nan trauma di situacionnan cu a bay te e periodo di e Di Dos Guera Mundial. E carta a ‘trigger’ algo. Hopi hende no tabata consciente cu e cos aki ta pasa. Hendenan a bin cu storianan cu partidonan a malusa nan data, te hasta deporta nan for di nos islanan. Y ta bay te na e periodo di guera. Hendenan cu e storianan ey a cuminza acerca mi.”

Thode a bisa cu su conseho ta pa ciudadanonan skirbi carta pa pidi e cambio di ley, cu ta den man di Prome Minister Evelyn Wever Croes. “Unabes cu pasa e data pa tercera parti y no tin reglanan stipula, cu por keda enforsa riba esaki riba e uso di data, no tin garantia cu no ta usa nan segun e proposito pa cual e articulo 10 a keda skirbi decadanan atras.”

Secresia

Di otro banda, secresia di voto ta keda fuerte si, hasta cu e articulo aki, dr. Thode ta enfatisa. Pasobra si un hende no bisa pa ken el a vota, ningun otro hende ta cune den e hoki di voto. “Esey ta un garantia. Nos sistema ta robusto, pues hende no mester tin reserva pa deposita nan voto. Pero hende mester realisa cu nan tin e derecho di vota den tur secresia y sin declara pa ken nan a vota. Y ningun hende ta permiti pa forsa ningun hende pa ken pa vota. E espacio di voto ta diseña pa e libertad di voto.”

QR Code

Pa yuda eleva e privacidad di votado, kier usa e sistema di e QR code, cu ta elimina e necesidad pa yama un hende su nomber na voz halto, manera semper tabata e caso. Door di introduci e code manera a sosode na Hulanda, no mester di haci e control manual, pasobra e sistema ta certifica e votado mesora. “E QR code ta controla digitalmente si un persona ta registra den e lista di votado y asina permiti e persona ricibi su stembiljet. E proceso ta identifica y ta certifica e votado, cu ta hisa e nivel di secresia.”

E uso di e QR code tambe ta den man di Prome Minister Evelyn Wever Croes.