Ayera comunidad por a tuma nota di un relato cu potret cu a circula riba rednan social y den medionan di comunicacion, tocante un supuesto detencion di un persona cu tabatin un paspoort falso. Sinembargo, autoridadnan no a duna claridad riba e hecho aki.
Por a tuma nota cu e persona en cuestion, un señora, tabata na Censo y na momento cu personal di e departamento aki a constata cu e paspoort cu e tabatin den su poder tabata falso, a bati alarma pa polis y e persona aki a ser hiba na warda di polis mesora.
Bon Dia Aruba a tuma contacto cu vocero di Polis, Lito Lacle kende a puntra si esaki tabata berdad, pero no por a haya un confirmacion di cu e noticia aki efectivamente tabata cierto. El a contesta “mi no a haya un confirmacion di dje”.
Igualmente Bon Dia Aruba a tuma contacto cu director di Censo, Sharine Luidens kende a informa: “Si nos constata cu tin iregularidad den cualkier paspoort of documento falso, ta nos deber pa yama polis y nan lo sigui cu e investigacion.” Esaki tampoco a duna confirmacion si e noticia aki tabata berdad of no.
Loke Bon Dia Aruba a ripara ta cu e situacion aki por trece cierto preguntanan dilanti: si tin algun personal di Censo envolvi den loke tin di haci cu dunamento di documentonan falso den e departamento y no kier informa comunidad; of si esaki por causa cierto alarma den comunidad, mirando cu ta temporada di eleccion y por existi documentonan falso circulando na Aruba, cu cual algun personanan cu no tin bon intencion por probecha di e situacion pa bay vota e dia di eleccion.
