Dianan pasa, Go Cultura Foundation a informa comunidad tocante un encuesta cu tin di haci cu un miho entendimento di e Industrianan Cultural y Creativo di Aruba.
Bon Dia Aruba a tuma contacto cu Edjean Semeleer fundador y embahador di Go Cultura, ken a splica cu desde aña pasa nan a cuminsa pensa cu e aña aki ta un aña cu lo tin un eleccion parlamentario y nan ta haya great e idea pa haci un Foro Politico y enfoca e foro aki riba importancia di cultura y creatividad di industrianan cultural y creativo di Aruba.
El a bisa cu tin varios aña cu ta wordo papia door di cierto gobernantenan y cierto departamento di gobierno “pero nos ta sinti cu toch ta haci falta mas empuhe, mas comprendemento pa reconoce e balor di e industrianan aki”, cu ta wordo forma door di e sector cultural y creativo di e isla, segun loke Semeleer a expresa.
Ora cu a wordo anuncia cu gobierno a cay, nan a acelera e iniciativanan y e trabaonan pa por haci e foro, y tambe a surgi e idea den un reunion entre e cuatro miembro di e fundacion tocante dicon no haci tambe un tipo di encuesta pa asina via di dje por haya un idea di kico ta e percepcion di un comunidad tocante industrianan cultural y creativo.
Pa haya si comunidad ta compronde, si ta di acuerdo pa bay desaroya un pilar economico nobo cu ta un di e pilarnan cu departamento economico a señala cu ta un pilar prometedor, esunnan den e sector tambe cu ta tuma e encuesta ta haya preguntanan diferente basa riba kico nan ta contesta, “e ta duna nos como organisacion idea di cuanto persona mas o menos ta biba danki na nan habilidad of recursonan creativo”, Semeleer a declara.
E resultado preliminar di e encuesta aki lo ta conoci 16 di juni y lo presenta durante nan foro cultural pa duna e politiconan un indicacion di kico ta e data of e datonan cu nan por acumula te cu awor, kico ta e percepcion, encuesta mes lo wordo cera na juli y e resultado final mes lo wordo publica entre augustus cu september via un investigacion profundo cu ta bay haci cu e datonan ey.
E resultado final aki lo wordo imprenta den forma di un buki y lo wordo presenta na Parlamento nobo di Aruba y tambe na e gabinete nobo cu e tempo ey lo a cuminsa goberna.
Semeleer a splica cu esaki ta pa nan mira cu no solamente ta importante pa papia di dje pero cu tin un grupo den comunidad cu ta tum’e cultura na serio y di nan banda tambe nan a tuma e iniciativa pa sigui cu e pasonan pa yuda desaroya e industria.
Te awor, el a expresa cu tin hopi hende cu a forma parti di e encuesta caba y tambe tin hopi di nan cu no ta ni forma parti di e sector, pero cu si ta wak e importancia di e sector, su balor economico y e desaroyo cultural cu e sector ta yuda crea, asina como tambe ta hopi importante e desaroyo social cu e sector aki ta yuda impulsa.
Den loke nan por a ripara, tin un falta di conocemento pa lo cual ta normal segun el a comenta, e iniciativa y esfuerso pa conscientisa no ta bin for di un grupo grandi di con e ta asina importante, tin varios hende cu a tuma e encuesta cu ta comunica back cu Semeleer y a bisa cu pa nan esaki ta algo nobo, manera el a menciona.
Pero e manera con nan a splica esaki den e encuesta, e ta resulta algo logico, cu ta purba di diversifica economia door di enfoca riba industrianan cultural y creativo.
A pone por ehemplo, conciertonan cu Semeleer mes ta haci y e impacto economico cu e concierto tin, como e bebidanan y cu ta wordo bendi den e concierto, salon cu hende muhe ta usa pa asisti na e concierto of e gasolin cu ta pone den auto, con iniciativa creativo ta impacta economia.
Tambe, el a trece dilanti cu den e encuesta nan ta mira cu a pesar cu pa hopi hende e ta algo nobo, e trabao grandi ta keda pa conscientisa kico e ta y dicon e ta importante, den e esfuerso ey bo lo a haya nan cu despues di encuesta tin un foro y nan lo sigui cu programanan top show, otro programanan como Ban Papia Cultura cu ta plataformanan cu ta sigui conscientisa su importancia.
Asina como tambe dicon mester inclui e industrianan den un sector di desaroyo mas sostenibel pa e isla, pa motibo cu “no ta tur politico ta wak’e ainda, no ta tur politico ta compronde tampoco ainda”, Semeleer a señala.
A wordo treci dilanti e situacion di Cas di Cultura pa loke ta trata infrastructura, stoelnan y e teatro mes cu na e momentonan aki ta deteriora, pa cu esaki Semeleer a indica cu personalmente e mes a señala e situacion aki desde 12 aña pasa, el a afirma cu esaki no ta pa tira den scochi di gobierno pero gobierno tambe hopi biaha tin falta di no reconoce e balor di e sector y cu esaki tin di haber tambe cu e maneho di e teatro.
“Teatro ta haya subsidio pa cubri salario, pero e ta rekeri di maneho tambe di e bestuur di stichting cu ta handle cu Cas di Cultura pa rekeri vision, pa tin un plan pa varios aña, con ta bay haci un teatro sostenibel y con ta bay mantene e teatro cu ta algo sumamente pa un pais” el a bisa.
E ta kere cu gobierno mester a actua pa no laga e situacion yega na unda e ta awor, “mi ta hopi ansioso pa sa kico e proximo gobernacion ta pensa di haci cu e teatro aki, pero mi ta sinti cu e falta ta bin di ambos banda”, Semeleer a indica.
E ta convenci cu simbolicamente e situacion cu Cas di Cultura ta aden, su persona ta pensa cu ta un situacion cu e sector tambe ta aden, no solamente cu pandemia di Covid-19 a bin pa haci’e mas pio pero pa hopi tempo nan tabata sinti cu nan capacidad y nan trabao no ta wordo reconoci manera algo valioso, cu ta algo cu nan ta haci’e manera un hobi cu no tin balor economico, pa forma hendenan, crea desaroyo social of no tin balor pa crea un producto cu e turista lo ta desea di bin y experiencia.
“Awor di repenti ta papia cu e turista kier un experiencia, siendo cu nos tin añanan bisando cu ta nos sector ta bay duna nan experiencia cultural”, Semeler a splica.
Igualmente, el a afirma cu nan mester ta mas creativo den pensa con pa yega na fondo pa por mantene e luganan aki y sigui bay dilanti.
Personanan interesa pa yena encuesta aki tocante miho entendimento di e Industrianan Cultural y Creativo di Aruba por subi riba e Facebook Page di Go Cultura Foundation y click riba e link of scan QR Code.
