Abogado mr. Anthony Ruiz: Fundacionnan ta pinta Aruba Ocean Villas den luz negativo sin ningun prueba concreto

Fundacion Parke Nacional Aruba y Fundacion Proteccion y Conservacion Commandeursbaai y Vecindario no kier pa Aruba Ocean Villas, AOV ehecuta su permisonan di construccion cu e tin den su posesion desde 2019 y Januari 2021.

Y mescos cu representantenan di Pais Aruba a bisa, mr. Anthony Ruiz representando AOV a bisa Huez cu caso aki ta pertenece den Corte Administrativo, esta LAR y a usa como ehempel con habitantenan di Seroe Colorado a bay LAR pa protesta e permiso di construccion pa e proyecto di hotel Secrets. E argumentonan aki a keda presenta den e caso sumario cu e dos fundacionnan a lanta contra e proyecto, AOV. For di Maart tur sa cu e proyecto tin su permisonan y ambos fundacion tabata traha hunto caba y por a entrega obhecion. Nan no a haci’e.

MCC

Abogado Ruiz a sigui mustra cu tur e bungalownan ta bay ta traha di forma ecologico, haciendo uso di material responsabel, mirando cu e meta ta pa ta un destinacion ecologico. Tur e vegetacion existente, incluso mangel lo keda intacto. E bungalows lo ta sosteni pa pilar di palo den buraco cu e compania Steen Marine Construction Consultancy and Excavation, MCC ta encarga pa pone. E compania ta specialisa den construccion di waf, construccion bou awa y entre otro ta duna hopi conseho. MCC a haci e trabou riba e brug chikito na Balashi, den area natural Spaans Lagoen, cu tambe ta keda rondona cu mangel. Eynan tambe a afecta naturalesa pero na un forma mas responsabel y menos impactante posibel. Y mescos cu ta e caso na Spaans Lagoen, ta premira cu naturalesa rond di AOV lo regenera mesora. Como tal e argumento di daño irreparabel no ta funda.

Pa loke ta FPNA, solamente un parti di e tereno ta considera tereno natural segun e ley Proteccion Naturalesa, e abogado a bisa. Te ainda e directiva di parke no a produci un plan di maneho, como tal no ta un interesado den e caso. Mesun cos ta conta pa Fundacion Commandeursbaai ya segun su statutonan, unicamente ta sostene FPNA den su trabounan.

Permisonan

Aunke cu DOW berdad a hala atencion di propietario Henriquez na 2016, pero esey no ta nifica cu Gobierno no por cambia di pensamento. Asina a duna opcion dia 24 di Juli 2019, bou condicionnan hopi stricto cu a conduci na entrega di e tereno den erfpacht na 12 di Maart 2021. Riba dje, tabatin un cantidad di corespondencia for di prome momento cu Henriquez a pidi pa e opcion, for di 2009 te cu e ultimo, dia 26 di October 2015, pues no ta cuestion cu a core duna e tereno den forma di nepotismo, vriendjespolitiek of clientelismo.

E conseho di ATA ta esey, un conseho, pero asina mes AOV ta cumpli cu e punto di salida di e maneho di turismo cu ta dirigi na turismo di calidad cu poco impacto pero cu ta genera mas entrada.

Tambe a asumi cu Directie Natuur en Millieu a duna conseho negativo basa riba e ponencia contra Isla di Oro. DNM no a conseha negativo contra AOV. Ademas no por compara pasobra Isla di Oro ta un area cu ta mucho mas varia na biodiversidad. Riba dje, AOV ta banda di Commandeursbaai, cual costa te cu Zeewijk ta yen di cas, piernan di piscado (ilegal), restaurant y hasta Marinierskazerne cu tin yen di actividad. Nada di esaki ta sosode banda di Isla di Oro.

MER

Pa loke ta e ROP, instancianan por a duna nan opinion riba e opcionnan. FPNA y Stichting Aruba Birdlife Conservation tabatin e oportunidad pero no a haci uso pa haci comentario riba e tereno di AOV. “E permisonan ta resultado di un proceso largo.”

Aruba tin unicamente dos compania cu por traha un Millieu Effecten Raportage, MER, esta e rapport riba efecto medioambiental. A scoge pa e compania di Sr. Kirby Barrera pasobra e otro no tabatin conocemento riba e area di lama.

Luz negativo

E abogado ta bisa Huez cu FPNA y Stichting Commandeursbaai ta purba pinta AOV den tur luz negativo dor di trece puntonan dilanti cu no ta berdad, entre otro cu tabata traha laga trabounan continua den oranan di anochi y weekend. “Tabatin toque de queda pa casi un aña.”

Ademas, AOV no ta activo den e parke marino/natural y no ta mata ni causa daño na ningun flora y fauna. “Berdad a crea un bulto di santo pa motibo di construccion pero esaki no tabatin consecuencia dañino. E quickscan di DCNA no ta duna ningun prueba ya cu a haci e trabounan den e area natura, unda AOV no ta activo,” mr. Ruiz a argumenta.

AOV no ta un proyecto di hotel grandi y e ROP ta indica cu ta trata di un area di balor cu por biba y hospeda. Berdad lo por tin algun daño na naturalesa durante e fase di construccion, pero AOV a tuma e pasonan caba pa mitiga cualkier daño, basa riba un plan di maneho y monitoreo. Di otro banda, FPNA ni Fundacion Commandeursbaai por a prueba daño. Tampoco AOV a kibra e orde maatregel di Huez pa no sigui traha, sino cu unicamente MCC a filma pa ilustra e situacion actual.