Siman pasa, Ministerio Publico a informa tocante e detencion di dos sospechoso den relacion cu e caso Avestruz, diabierna a keda conoci cu nan detencion a wordo prolonga, pero diasabra ultimo un di nan a sali liber.
Ex-minister y parlamentario Benny Sevinger un di e persona sospechoso den caso aki deteni diaranson di siman pasa ta wordo sospecha di a comete varios hechonan castigabel entre otro, soborno (omkoping), abuso di cargo (ambtsmisbruik), labamento di placa (witwassen) y participacion na un organisacion criminal (deelname aan een criminele organisatie).
Di otro banda, su casa Claudia Sevinger cu tambe a keda deteni diaranson ultimo, diasabra ultimo a keda den libertad den oranan di atardi, e cual a wordo ricibi pa algun miembronan di su famia den e porta di warda di polis di Shaba.
Den un declaracion di Claudia Sevinger cu ta wordo sospecha pa labamento di placa, el a bisa riba rednan social cu “esun cu lo duna su voto pa Benny ta un voto contra inhusticia y cu a pesar di tur e cosnan malo y falso cu ta wordo bisa contra dje, e ta un homber corecto, entrega na su pueblo y humilde”.
Asina mes, el a afirma cu diasabra despues cu autoridadnan a haci un par di preguntanan pa su persona el a keda liber, “rabia pasobra e ta algo inhusto, pero ya”, Sevinger a expresa.
Tambe, diabierna ultimo a keda conoci cu otro tres sospechoso a sali den libertad pero mara na condicionnan despues cu nan tabatin basta dianan deteni den relacion tambe cu e mesun caso aki Avestruz, banda di condicionnan general, hues-comisario a pone como condicion special cu e sospechosonan ta prohibi di tin contacto cu cierto personanan y cu nan mester coopera cu e investigacion.
