(EFE) – Halto Comisionado di ONU pa Derechonan Humano, Michelle Bachelet, a expresa su preocupacion ayera diadomingo pa enfrentamento na e ciudad Colombiano di Cali, cu a laga mas di un dozijn di morto, y a pidi dialogo y un investigacion independiente.
“Ta esencial cu tur e persona cu presuntamente a causa lesion of morto, incluyendo funcionarionan di Estado, pa nan lo ta suheto pa investigacionnan efectivo, independiente, imparcial y transparente, y cu e responsabel lo responde dilanti ley” Bachelet a bisa den un comunicado.
Cali, cu 2.2 miyon habitante, ta epicentro di protestanan violento y blokeo di camindanan cu ta pone un parti di e poblacion mal contento.
Aisla na un banda di e protestanan, e presidente Colombiano Ivan Duque, a desplega e ehercito na e ciudad bao e figura di asistencia militar cu ta permiti pa e soldaatnan apoya polis den tareanan di vigilancia.
Diestres persona a muri na diferente episodio, entre nan un funcionario di Fiscalia cu a tira y mata dos manifestante cu tabata blokia un caminda. Un grupo di hende a trapa e homber y nan matel’e.
Halto Comisionado a indica cu su oficina a ricibi informacion tocante individuonan arma, incluyendo e oficial cu a tira den direccion di e manifestantenan, periodistanan y esunnan cu tabata presente, asina como tambe riba e morto di e funcionario aki.
Asina Bachelet a yama pa un dialogo pa resolve e demanda di e manifestantenan y di esun cu ta opone na e protestanan y a celebra e “compromiso expresa pa varios actor, na Cali y na nivel nacional, di haya un solucion negociabel y pacifico”.
Oficina di Halto Comisionado di ONU pa Derechonan Humano na Colombia a indica cu a ricibi informacion di por lo menos 30 persona deteni dia 28 di mei. Bachelet a pidi pa garantisa “un huicio husto” y pa preveni mas desaparicionnan.
Desde 28 di april dia pa dia multitud di hende ta wordo mobilisa pa protesta contra gobierno pa abuso di polis y e maneho di e crisis economico cu e pandemia a trece cune.
