(EFE) – Presidente di Brasil Jair Bolsonaro, a pidi pa Corte Supremo di Husticia caba cu e medidanan di restriccion cu a wordo adopta pa evita e plamamento di Covid-19 na 3 estado di e pais, aunke tin halto posibilidad cu lo registra un di tres ola di e pandemia den e proximo simannan, segun expertonan.
A traves di Oficina di Abogado di Estado, e mandatario, un di e lidernan cu mas a nenga e gravedad di e virus, a introduci na Supremo un accion directo di inconstitucionalidad pa medidanan di aislamento y toque de queda cu a wordo imponi pa gobiernonan di Pernambuco, Parana y Rio Grande do Norte, pa via di aumento di contagio.
Segun e peticion, “intencion di e accion ta pa garantisa e convivencia di derechonan y garantia fundamental di e ciudadano, como e libertad di bay y bin back, e derecho di trabou y subsistencia, hunto cu e derechonan pa bida y salud di tur ciudadano, mediante aplicacion di principionan constitucional di legalidad, proporcionalidad, democracia y estado di derecho”.
E iniciativa ta argumenta cu e cuidado di salud “mester combina cu e minimo proteccion di otro libertad fundamental, y ademas, mester considera e efectonan di medidanan extremo y prolonga ta trece pa e subsistencia di personanan, educacion, relacionnan familiar y social y pa e propio salud fisico-emocional- di e poblacion”.
Cu mas di 456.000 morto y 16.3 miyon caso di covid-19 confirma, Brasil ta un di e pais mas asota pa pandemia, y ta e segundo cu mas fayecido, despues di Merca y di tres cu contagio, despues di e nacion Mericano y India.
Na comienso di mei, e lider di ultra derecha Brasileño a yega di adverti cu por dicta un decreto pa garantisa e ciudadanonan e “libertad” di “traha” y “bay y bin back”, den e regionnan na unda tin restriccionnan pa Covid-19
