Durante algun luna nos por a tuma nota di un renobacion cu ta tumando luga na un edificio ubica na Steenweg 19 cu tabata ex-Botica Aruba añanan pasa.

Tocante esaki, Bon Dia Aruba a tuma contacto di Mircla Nava di Monumentenfonds Aruba e cual a informa cu nan a cumpra e edificio aki na 2015 pa su preservacion. Nava a expresa cu na 2015 nan a cumpra e edificio mirando cu e tabata core e riesgo di wordo basha abou, aña pasa na juli nan a tene un destaho publico y a otorga e proyecto na Van Kessel Havenbouw NV.

 

Asina mes, el a comenta cu e proyecto ta encera e prome fase di e restauracion cual lo ta solamente e exterior di e edificio, e motibo ta cu ainda nan no tin un huurdo pa e edificio, asina nan logra haya un partner interesa den huur e edificio nan lo haci e di dos fase cual ta e interior di e edificio pa asina por adapta esaki na e necesidadnan di e huurdo.

“Ya por mira un adelanto grandi caminda cu a kita e partinan cu no ta monumental pa asina trece e edificio bek den su estilo original cu su balcon. E ta hayando su colornan original tambe, incluyendo e colornan di e decoracionnan cual a wordo descubri durante e proyecto”, Nava a declara. Nan ta spera cu pa e luna aki e proyecto lo keda finalisa.

E edificio ta un monumento proteha construi na aña 1925 pa Addison Winfield Croes. Na aña 1935 hunto cu Gustave Nouel nan a cuminsa cu Botica Aruba, e botica a cera su portanan na aña 1985. Despues Palais Hindu a cumpra e edificio y na 1993 El Mercado a habri su portanan, despues e edificio a para algun aña bashi y Monumentenfonds Aruba a cumpra esaki na 2015 pa asina por preserva esaki pa futuro generacionnan.

Tocante ki tipo di actividad por wordo haci na e edificio aki of con por wordo utilisa, Nava a menciona cu e por ta destina pa diferente opcion, oficina, restaurant, cafe, bed and breakfast, retail space etc.

Tambe, el a laga di conoce cu si un persona tin un idea pa cu e edificio aki, e por acerca nan libremente pa asina discuti e posibilidadnan pa por adapta e edificio y wak si e espacio ta apto pa e persona of negoshi su necesidad, Nava a finalisa.