Departamento di Impuesto ayera mainta a ofrece un conferencia di prensa pa duna di conoce algun cifranan cu tin di haber cu pago di impuesto di vehiculo di motor y cu e fecha final pa paga e impuesto aki lo ta dia 2 di augustus di 2021.

Luanne Gomez-Pieters director di departamento di Impuesto a menciona cu prome cu fin di aña di aña pasa nan a sinta pa haci algun cambionan, loke ta trata pagonan parcial pa contribuyentenan, con sistema di pago y proceso di cumplimento di pago di impuesto di vehiculo di motor a bay te na e momentonan aki.

Tin un total di 88.997 vehiculo registra, di esaki e contribuyentenan cu a haci un pago completo di impuesto di vehiculo di motor ta 80.4%, loke ta nifica cu 71.529 contribuyente a cumpli cu nan pago, segun loke Gomez-Pieters a señala.

Nan tin un total di 15.204 plachinan cu no ta paga of no tin pago riba nan, esey ta nifica 17.1%, esaki ta inclui plachinan A (12.570) DT (203) MFA (466) plachi di nomber (185) y V (1.142) tambe tin algun contribuyentenan cu a haci entrega di nan plachinan (2.264) mirando cu nan no ta bay haci uso di dje durante aña 2021.

Asina mes, Gomez-Pieters a expresa cu e fecha final pa e pago di e dos mita di impuesto di vehiculo di motor ta 30 di juni, e fecha aki conhuntamente cu minister di Finansa a keda aplasa pa 2 di augustus di e aña aki, algo pa loke nan a haci un apelacion na e contribuyentenan cu no a paga nada ainda pa haci nan pago y evita cu lo por haya un cobransa adicional y multa.

E pago aki por tuma luga di un manera parcial cu nan a introduci e aña pasa, den e prome mita di aña nan a saca 15.603 cobransa adicional pa contribuyentenan cu no a cumpli.

Asina mes, Gomez-Pieters a bisa cu nan a introduci un sistema tambe pa pidi e comprobante di pago via online, el a sigura cu hopi cliente a haci uso di dje y nan a siña cu den e proceso tin algun cos cu nan mester mehora den futuro, 19.579 contribuyente a pidi un comprobante di pago digital entre luna di januari te cu awor di e cual nan a procesa 15.057 peticion.

El a señala cu nan tin un ekipo di tres persona so cu ta procesa e comprobantenan di pago aki, ta falta un suma di 4.500 comprobante di pago ainda pa procesa y nan ta kere cu pa fin di luna aki di mei nan por keda cla cu tur cu ta pendiente.

Di esaki, el a declara cu tin cierto contribuyente cu no a pone e informacion corecto den e peticion di comprobante digital como por ehemplo, cu e pago a sucede via transfer y no via bill payment, tin pagonan di persoon nummer of sin nummer plat entre otronan, loke ta duna nan e desafio cu nan no por saca e comprobante di pago den un solo biaha.

Mirando cu ainda pandemia di Covid-19 ta existi, nan no por atende un cantidad grandi di contribuyentenan den nan sala y esey a causa cu nan ta atendiendo cu e sistema digital di pago.

Di loke tin di haber cu pagonan parcial, Gomez-Pieters a comenta cu 5.758 contribuyente a haci uso di dje den e termino cu a caba di pasa aden y e categoria mas grandi ta plachinan A.

Un pago parcial ta ora un contribuyente ta paga su impuesto den varios pida, e no ta nifica un areglo di pago pero e persona por haci su pago di biaha y no warda te na ultimo. Aworaki tin mas pida cu antes cu tabata parti den kwartaal segun loke el a enfatisa, pa motibo cu no tin di haber solamente cu pandemia sino cu tur aña nan ta mira cu impuesto di vehiculo di motor ta un topico cayente na unda pa algun biaha e hende ta bisa cu e no tin e cen pa paga y esaki ta pa flexibilisa e maneranan pa haci e pago.

E condicionnan pa cu esaki ta cu ta paga e impuesto di vehiculo di motor delanta, ta haci e pago pa luna y ta paga e suma minimo rekeri cu ta sea 50AWG pa plachi A of 200 AWG depende di e categoria di e plachi, no por paga menos cu 50 AWG.

Di mesun manera a wordo treci dilanti cu control di polis no ta tumando luga manera mester ta motibo cu ainda tin hende cu no a paga nan impuesto di auto, pa cu esaki Gomez-Pieters a afirma cu Polis ta controlando caba na unda por a mira cu ainda tin algun plachinan di number di colo oraño riba caminda, manera el a menciona tin mas di 200 plachi cu no tin ningun impuesto paga riba nan.

Gomez-Pieters a enfatisa cu un di e desafionan di polis ta cu ora nan para e contribuyente den caminda y nan ta tuma e auto den beslag no tin caminda pa nan warda e autonan, esey ta un punto di atencion cu nan ta bezig ta wak kico ta e opcionnan cu tin pa esaki por sucede den un manera mucho mas eficiente.

E multa pa esaki segun el a sigura ta 75 AWG y cu tin contribuyente cu no ta worry cu esey, “nos tin cu bay mucho mas leu, nos tin cu traha hunto si nos kier logra un cumplimento cu impuesto”, Gomez-Pieters a declara.

E departamento di Impuesto tambe ta facilita e contribuyente pa paga, segun loke el a menciona y cu ta responsabilidad di gobierno y di un departamento pa facilita e pago di impuesto pero ta toca tambe e responsabilidad di tur ciudadano cu si tin un auto y ta subi riba e caretera di e pais aki, e tin mester di tin tur su documentonan na regla.

“Si un hende ta haya un accidente cu dañonan material of porta un hende ta fayece, si e persona tin seguro, e seguro por cubri cierto gastonan, mi ta mira cu hopi biaha e responsabilidad cerca e contribuyente cu nos tin un responsabilidad pa cumpli cune ora ta trata di impuesto y otro tipo di responsabilidad”, Gomez-Pieters a bisa.

Pa cada aña miles di persona tin cu haci nan registracion di auto nobo cerca un MFA, pa cu esaki Bon Dia Aruba a puntra dicon no por pone e data base ey na local di DTI pa asina e proceso lo ta mas facil y mas eficiente, pa cu esaki Gomez-Pieters a contesta cu tin un parti di proceso di digitalisacion cu nan no a haci ainda, pa registra e auto nan tin un formulario riba nan website na unda e persona por download y yen’e pero esey ainda no ta den su forma digital, nan ta sperando riba presupuesto di aña 2021 pa tin e espacio financiero pa nan por sigui digitalisa nan sistemanan.

Tocante un investigacion cu departamento di Impuesto ta enfrenta den relacion cu malversacion di fondonan Gomez-Pieters a informa pa Bon Dia Aruba cu e investigacion ta andando ainda y nan ta atendiendo esey di un manera diligente y hopi serio, autoridadnan ta encarga cu e investigacion aki y esey ta haci cu ta dificil pa duna detayenan di e caso, ora nan por trece dilanti mas informacion nan lo haci via medionan di comunicacion, “e contribuyente tin su derecho tambe pa sa kico ta sucede y con e ta sucede”, el a finalisa.