(AP) — Un corte Hulandes diaranson a ordena Royal Dutch Shell pa reduci su emisionnan di carbon pa neto 45% pa aña 2030, compara cu nivelnan di 2019, den un caso historico presenta pa gruponan di activismo di clima, cu a elogia e decision como un victoria pa e planeta.
Corte di Districto Den Haag a duna veredicto cu e gigante di energia Anglo-Hulandes tin un deber di cuido pa reduci emisionnan y cu su plannan di reduccion actual no tabata suficiente concreto. E decision ta pone un precedente pa casonan similar contra companianan multinacional contaminando rond mundo. Activistanan a reuni pafo di sala di corte y a grita di alegria na momento cu a lesa e decision.
“Clima a gana awe”, segun Roger Cox, abogado pa e brasa Hulandes di Friends of the Earth, cu tabata un di e organisacionnan tras di e caso. “E veredicto aki ta bay cambia mundo. Mundialmente, hende ta den inicio pa cuminsa tuma accion legal contra companianan petrolero siguiendo nos ehempel”, Cox a agrega.
E corte na Den Haag no a bisa con Royal Dutch Shell mester logra e reduccion cu a ordena, bisando cu e compania mama di e gigante di energia ‘tin libertad completo den con ta cumpli cu su obligacion di reduccion y den duna forma na politica corporativo di Shell group.”
Den un reaccion por escrito, Shell a bisa cu ta spera di apela e ‘decision decepcionante di corte’. E compania a bisa cu ya ta ‘invertiendo biyones di dollar den energia di carbon abao, incluyendo recarga di vehiculo electrico, hydrogeno, renobabel y biofuel. Nos kier aumenta demanda pa e productonan aki y escala nos negoshi di energia nobo mas rapido ainda.”
Na un audiencia na december, abogado di Shell, Dennis Horeman a bisa cu un veredicto contra e compania por crea un situacion ‘den cual cantidad sin fin di partido por tene otro responsabel pa nan rol den e transicion di energia ey a traves di corte’ y duna huesnan ‘un rol central den un proceso politico activo y delicado’.
Shell a bisa cu a pone ‘un ambicion pa ta un negoshi di energia di emisionnan neto-cero pa 2050, of prome’.
E corte a bisa den un sumario na Ingles di su veredicto, cu Shell actualmente no ta den violacion di su obligacion pa reduci emisionnan, manera e gruponan ambientalista a argumenta, pasobra e compania mama ta reforsando su politica di emision.
Pero a duna veredicto cu politica di Shell ‘no ta concreto, tin hopi caveat y ta basa riba monitoreo di desaroyonan social na luga di e propio responsabilidad di e compania pa logra un reduccion di CO2’.
“Pa e motibo aki, e corte a ordena RDS pa reduci emisionnan di Shell group, su proveedornan y su clientenan pa 45% neto, compara cu nivelnan di 2019, pa fin di 2030, a traves di politica corporativo di e Shell group.”
Un grupo di shete organisacion ambientalista y di derechonan humano, y alrededor di 17mil ciudadano Hulandes, a entrega e caso na 2018, pidiendo e corte ordena Shell pa reduci emisionnan den linea cu e metanan global delinea den acuerdo climatico di Paris. Esey ta igual na un reduccion di 45% di emisionnan di Shell pa 2030.
E corte a dicidi riba e declaracionnan di seis di e gruponan.
E caso na Hulanda ta esun di mas grandi den un fila di retonan legal entrega rond mundo pa activistanan di clima buscando accion pa reduccion di emisionnan, pero ta kere cu ta e prome cu a enfoca riba un compania multinacional.
