(LaPatilla/Reuters) –E promer importacion di diesel na Venezuela desde november 2020 a yega e siman aki a bordo di e barco Bueno, cu casi 500.000 bari di combustible, asina agencia Reuters a informa.
No a keda cla ken a proporciona e combustible, cu ta yega na un momento critico di escasez di diesel. Esaki ta un menaza tanto pa sectornan productivo, manera agricultura, pero tambe pa e cuerponan di seguridad cu ta sostene e regimen di Nicolas Maduro.
Aunke e sancionnan di Merca ta permiti importacion di combustible di parti di regimen Venezolano bao excepcion humanitario, e abogadonan consulta pa Reuters ta bisa cu e empresanan mester di un autorizacion specifico di Departamento di Tesoro di Merca.
Departamento di Tesoro a nenga di duna comentario. Un portavoz di Departamento di Estado a bisa cu e politica Mericano encuanto e intercambio di diesel vincula na Venezuela no a cambia. “Esnan cu ta participa den tal transaccionnan ta sigui den riesgo di exposicion na nos sancionnan,” e portavoz a bisa.
Den ultimo añanan Venezuela a bira dependiente di gasolin y diesel importa pa compensa e produccion nacional insuficiente di empresa estatal Pdvsa. Te ultimo trimester di 2020, tempo cu Merca a ordena e empresanan involucra pa para e suministro di diesel, mayoria di importacion di combustible na Venezuela tabata yega como intercambio di combustible pa crudo Venezolano cu clientenan di Pdvsa.
E principal proveedor di diesel na Venezuela te november tabata Reliance Industries di India bao di un intercambio autoriza pa gobierno Mericano.
E barco Bueno, cu bandera di Djibouti, a yega Amuay diadomingo. El a haci un promer descarga a traves di transferencia ‘di barco pa barco’ y despues a drenta puerto pa descarga e resto, segun e documento maritimo, material fotografico cu Reuters a haya pa mira y fuentenan cu conoce e situacion.
