San Nicolas ta keda… Huerfano sin futuro…?

Nos ta den campaña electoral y esaki den tur sentido ta e temporada di haci promesa. Desde su deterioro economico y social di mas di cuatro decada, San Nicolas ta e parti di nos isla cu, si por a converti promesa den cash, lo tabata awe e parti mas prospero di Aruba. Sin embargo, realidad di e mundo aki ta diferente, y promesa ta net lo contrario: palabra, biento ta bay cu nan.

Regularmente, tambe den e ambiente politico, ta critica otronan pa ta haci promesa bashi, loke lamentablemente semper ta logra convence un parti di e poblacion. Loke nos por mira a traves di añanan ta cu e practica aki ta keda ripiti, tambe cerca esnan cu anteriormente tabata critica e promesanan di nan contrincante. Asina gobierno ta bin y gobierno ta bay, y e unico cos cu nos por a mira ta mas deterioro, den tur sentido. Lo ta inhusto pa bisa cu no a sucede nada. Cada gobierno ta haci intento pa mehora algo, y aunke mester bisa cu a mira mehoracion parcial riba cierto tereno, esey no tabata toca e mero curazon di e problema. Mas bien e tabata parce cu e partidonan tabata busca un forma di haci algo, cu ta mustra o zona bon pa hustifica den campaña, pero tabata carece di un vision integral di kico realmente mester pa logra cambio sustancial pa e poblacion.

Y kico e problemanan tabata anto? Aki nos ta yega na e base di cualkier plan serio pa mehora problemanan multifacetico y compleho manera na San Nicolas: un analisis completo di e situacion cu ta desea di ataca. Realidad ta cu practicamente nunca a bin un plan total asina. Loke a yega hopi cerca tabata e plan urbanistico cu gobierno a traha hunto cu universidad di Pennsylvania na 2010/2011, cu a bin cu un plan bastante detaya di mehoracion di e centro di San Nicolas, un cu e refineria ainda presente y otro sin e refineria. E diseñadornan di e universidad a argumenta tambe cu a lo largo nan no ta mira un futuro pa e refineria y cu e plan final mester contempla reuso di e tereno di e refineria pa otro actividad. E plan tabata contempla entre otro crea un apertura, un vista pa lama pa e ciudad, algo cu e nunca tabatin, y un ‘reshape’ di e area di downtown.

E plan menciona nunca a haya divulgacion amplio den pueblo, probablemente pasobra e no tabata cuadra cu e pensamento di e gobierno di e momento ey, cu tabata carga speranza ainda cu lo por reactiva e refineria y a pone esey como prioridad, e unico prioridad. E resto di e storia nos conoce: a gasta energia y placa na busca un partner, despues a sigui tur e corupcion alrededor di Citgo y Refineria di Aruba, mientras cu e comunidad tabata warda ainda – cu demasiado pacenshi – riba un respuesta pa nan problemanan cu ta bay hopi mas leu cu un refineria cu ta habri si of no. Y aki ta unda ta sinti mas falta di un analisis drechi, no traha pa politico cu mester material di envuelta pa nan promesanan, sino un estudio serio cu ta duna prioridad na e problemanan socio-economico di e ciudad. Nos ta conclui cu un estudio asina nunca a ser haci. Nos a menciona e estudio di Pennsylvania cu tabata un bon ehercicio urbanistico, pero no tabata profundiza mas den e problemanan di e poblacion mes. Probablemente no tabata e ‘opdracht’ cu nan a haya. Awor, kico un estudio asina lo mester abarca, pa por atende e necesidadnan di e comunidad di mihor forma? Ban cuminza unda mester cuminza, cu un tiki di historia. E salida masivo di gran parti di e poblacion no Hulandes a percura caba cu e poblacion di e ciudad a keda reduci den añanan 50 y 60. Despues, e deterioro economico a percura pa hobennan bay, y no bolbe. San Nicolas a bira un ciudad di poco actividad economico y di hopi hende di edad cu entrada chikito, cu no por a mantene nan cas mas. E deterioro di San Nicolas no ta solamente cu no tabatin empleo, no tabatin recurso financiero pa un parti di e poblacion pa mantene nan vivienda. Banda di un gobernacion deficiente cu tabata parce di no mira e importancia di mantene e infrastructura en general, a bin e deterioro di propiedad priva cu a yuda crea e aspecto mahos cu nos por mira awe. Cu nos por mira, si nos ta dispuesto di mira e realidad ey, pero ta parce cu hopi di nos politiconan ainda no ta mira esaki. Nan no ta consciente con grandi e tarea ta pa trece e ciudad aki den condicionnan, laga nos yama nan ‘aceptable’, pa no crea expectativa exagera.

E opinion aki ta formula sin tuma na cuenta loke partidonan politico eventualmente ya a duna di conoce como nan plan electoral pa San Nicolas pa 2021 – 2025. Nos lo duna un opinion acerta riba eseynan despues, pero e critica general aki ta djis un recordatorio cu asfalta un caya, pone luz unda no tin, traha un rotonde o polis drumi, hasta un centro medico bon intenciona, no ta ni cuminza indica e cambio profundo, e tarea primordial pa cualkier gobierno. Promesa por cumpra voto, pero no ta cambia nada.