Ayera mainta, Ministerio Publico a confirma cu Landsrecherche a detene Oslyn Benito Sevinger ex-minister y parlamentario di partido AVP. Ademas a keda conoci cu su casa tambe a keda deteni den relacion cu e caso Avestruz.
Ministerio Publico tambe a informa cu nan no lo duna mas informacion pa awor pa loke ta trata e interes di e investigacion.
Manera ta conoci, investigacion aki a cuminsa na aña 2019, Landsrecherche bao guia di hues-comisario den cooperacion cu Cuerpo Policial di Aruba y RST (Recherche Samenwerkingsteam), a haci entradanan hudicial na diferente adres pa loke ta trata un investigacion di Landsrecherche di delitonan di corupcion posiblemente cometi rond di entrega di terenonan di gobierno entre 2009 y 2017.
E investigacion aki a keda conoci como e famoso ‘Caso Avestruz’ na unda durante e diferente entradanan hudicial a confisca documentonan administrativo y material cu diferente tipo di data, den esaki tambe ta wordo investiga e posibel rol di e parlamentario y ex-minister Sevinger cu ta dirigi riba e pregunta si companianan a haya derecho di erfpacht a base incorecto.
Den luna di october 2019, Ministerio Publico cu cooperacion di Cuerpo Policial di Aruba, RST y Landsrecherche a haci e prome entrada hudicial na cas di e parlamentario y ex-minister Sevinger bao guia di hues-comisario na unda segun e ‘Beschikking Huiszoeking’ cu Bon Dia Aruba a haya ta poni cu ta sospecha cu Sevinger a haci su mes culpabel di falsificacion di documentonan cu ta cay bou di articulo 2:184 di Codigo Penal di Aruba, estafa segun articulo 2:305 di Codigo Penal di Aruba, aceptacion di soborno bou articulo 2:350/2:351 di Codigo Penal di Aruba, mal uso di su funcion cu ta cay bou articulo 2:354 di Codigo Penal di Aruba y labamento di placa cu intencion/custumber cu ta cay bou articulo 2:404/2:405 di Codigo Penal di Aruba.
Despues di varios luna, na januari di 2021 e di dos entrada hudicial na cas di ex-minister Sevinger a bolbe tuma luga y segun un declaracion di e ex-mandatario el a bisa cu nan a drenta su cas pa confisca e telefon di su casa, ademas el a declara tambe cu segun e ta trata di un persecucion politico.
Despues cu e noticia di e detencion a keda conoci den comunidad, siguidonan di e partido berde y di e ex-minister mes a reuni na su cas di partido ubica na Rancho pa duna su apoyo pa e politico na momentonan aki.
