Manera nos por observa, e partido grandi den e gobierno demisionario a scoge pa defende su opcion (logico) pa e acuerdo cu Hulanda, den e actual campaña electoral. Esun cu kier critica e posicion aki, lo mester bisa anto claramente cu kico e no ta di acuerdo. Pero esey no ta loke nos ta tende, al menos, no di e rivalnan cu eventualmente ta contra e acuerdo, salvo algun excepcion. Aki aya ta tende ainda murmuracion cu a ‘entrega autonomia di Aruba, pero segun nos analisis di e hechonan manera nan a sucede, esey a tuma lugar na 2014 caba… Y ta interesante pa na promer lugar nos tende di e rival grandi den oposicion ki posicion nan ta tuma awe. Aparentemente nan no ta posiciona nan mes linea recta contra e acuerdo cu Hulanda, pero ta cana un caminda mas oculto. Asina a yega na e lema di “plan di rescate di Aruba”. Nos no ta descarta e lema ey riba su mes, pasobra Aruba ta den un situacion cu mester di un rescate, pero esey tabata e caso un aña pasa caba… Aruba no a drenta crisis di Covid-19 den un situacion di canta gloria, sino cu tabata existi un crisis – financiero – caba.
Como cu e partido opositor no tabata den e ‘driver’s seat’ nan por a keda para na banda pa observa kico esun lo a haci, cu si mester a actua pa rescata Aruba, no awor sino aña pasa, y cu en berdad a cuminza haci loke tabata necesario pa logra e rescate. Esaki no a bay asina facil, pasobra e exigencianan cu a bin riba mesa di banda Hulandes tabata hopi y ta corta profundamente den mente y sentido di orguyo (falso o genuino) di hopi di nos politiconan, pero manera nos por a mira, bao presion grandi di opinion publico, a yega na tal acuerdo di rescate. Esey no a bay asina facil internamente tampoco, pasobra tabatin un par di cabez cayente den parlamento cu tabata dispuesto pa hiba e tipo di bataya manera na Corsou y St Maarten, cu ta resulta perdi promer cu nan a cuminza. Finalmente tur hende den e fraccion grandi cu ta sostene gobierno a cuminza cana ‘netjes in de pas’ y a suma nan mes na e linea aparentemente stipula pa e actual lider, cu ta e mihor ruta disponible pa yega na exito.
Y kico nos mira ta pasando? Ta trece e futuro promer ministro di Corsou, si e pasa e screening, den un aparente bishita di placer cu ‘amigonan bieu’, nada contra esaki, pero seguidamente ta sucede un par di cos straño. Despues di un entrevista cu e medio mas cerca di e partido di repente e candidato pa promer ministro no ta haya oportuno mas pa duna entrevista. Nos sa esey pasobra nos medio a acerca e candidato pa un entrevista y el a hala atras, despues cu inicialmente e tabata dispuesto. Algo mester a pasa, nos no sa kico, cu a haci cu e no tabata interesa mas pa atende nos. Loke por a sucede ta cu el a bin realisa su mes cu acercando su futuro colega di e manera aki, na man di algun rival politico, no ta e manera pa inicia e relacion cu pronto lo ta uno oficial di ambos banda. Y tambe cu posiblemente el a realisa cu laga nan usa su persona den e debate electoral na Aruba, sigur si e mester bay bisa algo tocante e posicion cu gobierno di Aruba a scoge den e crisis, talvez lo no ta contribui na su relacion bastante fragil cu Hulanda.
Ta pesey tambe cu nos ta kere, contrario na loke otro medio di e mesun color politico a sugeri, cu e no tabata desea di acerca promer ministro di Aruba, pasobra esey lo tabata totalmente inapropia. Lag’e warda te ora e ta nombra y e por bin haci bishita oficial. Ta inapropia pa e futuro ministro presidente di Corsou bin di bishita priva cerca algun amigo di e partido rival anto haci cualkier expresion cu ta toca maneho actual di gobierno di Aruba. Si e partido opositor tabata kier a haci uso di su presencia na Aruba pa saca algun probecho electoral, esey en todo caso no a logra. Esaki no ta manera pa busca un posicion contra e rival demisionario encuanto e acuerdo, segun nos opinion. Lo ta mas factible cuminza dedica atencion na e detayenan di e acuerdo, formula tambe den e Uitvoeringsagenda, y bin cu critica o proposicion concreto. Mester bisa cu riba cierto tema, manera enseñanza, e partido opositor en berdad a cuminza detaya su posicion y esey ta bon pa e debate cu mester tuma lugar den e simannan nos dilanti. Riba cada punto cu por trece dilanti ta necesario indica e cambionan profundo cu mester tuma lugar y expresa tambe e compromiso pa ehecuta esaki. Ta di lamenta si cu riba varios tema clave, manera maneho di personal di gobierno, un di e temanan mas cayente den e contienda electoral aki, nos no ta mira tanto opinion explicito. E incidente cu e politico di Corsou ta demostra dos cos: e acuerdo cu Hulanda ta dicta e debate, aki y na e hermana isla. Y e politico bishitante a mustra mas sensatez cu su anfitrionnan.
