Diploma pa muchanan di scol special lo ta obligatorio for di periodo 2021-2022

Manera a keda conoci algun tempo pasa, muchanan di scol special Scol Practico pa Ofishi (SPO) lo ricibi un diploma ora nan ta caba nan estudio. Esaki anteriormente no tabata e caso, sino cu nan tabata haya un certificado.

Comentando riba e desaroyo aki, minister demisionario di Enseñansa, Ciencia y Desaroyo Sostenibel, Armando ‘Rudy’ Lampe a splica cu e muchanan special ta pasa añanan den scol primario y secundario, pero nan no tabata haya un diploma na final di nan carera educativo.

“Esaki ta hopi tristo pasobra cu pa añanan nos a acepta un situacion cu no ta aceptabel”, Lampe a comenta.

Ademas, el a indica cu no ta pa motibo cu nan ta muchanan special nan ta keda sin haya un diploma. Nan tabata ricibi un certificado cu no tabatin un efecto civil. Aworaki nan a instrui Directie Onderwijs como Inspectie, mustrando tur e base legal cu tin y cu ta trata di scolnan cu ta cay bao supervision di Inspectie, y cu no tin ni un motibo pa nan no tin un diploma, segun loke el a expresa.

Pa e motibo aki, Lampe a bisa cu mescos cu otro alumnonan cu na scol ta ricibi un diploma, SPO tambe ta cumpli cu e mesun exigencianan y lo mester duna un schooldiploma.

Di e mesun manera, el a sigura cu na Hulanda esaki ta sucede for di aña 2019 caba, y cu Aruba ta sigui e ehemplo aki, unda ta posibel como scol practico. Ademas, Lampe a indica cu ta bay haci e entrega di e diploma aki algo obligatorio tambe for di e periodo 2021-2022, ta p’esey cu nan ta pidi pa e SPO diploma keda registra na Examen Bureau pa keda reconoci.

Igualmente Lampe a indica cu nan ta den contacto cu Hulanda caba, y cu na dado momento ta bay ricibi e reconocemento pa schooldiploma pa Scol Practico pa Ofishi, pa di e forma aki tin igualdad entre nan y scolnan practico di Hulanda. E idea ta pa asina ta posibel cu e studiantenan di SPO por logra e reconocemento di Hulanda di e diploma di SPO, y di e manera ey nan por keda reconoci den area laboral y nan por cuminsa traha.

Di mesun manera, Lampe a informa cu diabierna di siman pasa nan a entrega diplomanan di Kinder Coach na maestronan di scol. A haya e aprobacion pa usa e stimuleringsfonds, cu ta fondonan cu ta bin di Hulanda, pa stimula hendenan pa sigui studia den e region. Asina por a financia e opleiding di Kinder Coach, unda maestronan a haya e hermentnan pa mira cu ta e mucha ta central, mientras e maestronan ta un coach pa e mucha den su desaroyo.