(EFE) – Mandatarionan di Mexico, Costa Rica, Ecuador, Jamaica, Bolivia, Argentina y Uruguay dialuna ultimo a emiti un carta den cual nan ta insisti pa comunidad internacional e pedido di un distribucion imparcial di vacunanan contra Covid-19, nan ta considera cu esey ta e unico opcion pa supera e pandemia.
“Acceso universal oportuno y imparcial pa vacunanan ta e unico opcion sostenibel pa caba cu e crisis sanitario, ta di interes comun y necesario, sanitario y economico”, e carta ta indica.
Presidente di Costa Rica, Carlos Alvarado, a publica e documento riba su rednan social y a bisa cu ta un pronunciamento conhunto cu su coleganan di Argentina, Alberto Fernández; di México, Andrés Manuel López Obrador; di Bolivia, Luis Arce; di Ecuador, Guillermo Lasso; di Uruguay, Luis Lacalle Pou, y prome minister di Jamaica, Andrew Holness.
“Nos ta nota cu un grave preocupacion cu, di e 1.300 miyon dosis di vacuna contra Covid-19 cu a wordo administra globalmente, mas di e mita a wordo utilisa na 5 pais cu ta concentra e 50% di PIB global; incluyendo algun paisnan cu a administra mas dosis cu Africa y America di Sur. Den total, e paisnan di renta baho a ricibi un 0.3% so di e dosis mundial” e pronunciamento ta señala.
Den e texto, e hefenan di Estado ta haci un “yamada na e paisnan cu ta conta cu exceso di dosis cu ya caba a vacuna nan poblacion di riesgo, pa pone den marcha medidanan pa cu e dosis cu ta resta lo wordo distribui di manera inmediato”.
E pronunciamento ta recorda e desigualdad na acceso pa productonan y tecnologia sanitario, “no ta un fenomeno nobo”, pa loke ta necesario “siña di loke HIV a laga den e decada di añanan 90”.
Gobernantenan Latino Americano y Caribeño ta enfatisa e necesidad di “supera e retonan cu e negociacionnan bilateral ta genera, e falta di poder di negociacion pa e procesonan di adkisicion, restriccion pa exportacion y derechonan di propiedad intelectual cu ta limita di manera critico e yegada di vacuna na tur pais”.
