Prome minister Evelyn Wever-Croes: ‘Cada kwartaal nos ta depende di sosten di likides di Hulanda’

Durante un conferencia di prensa ayera di prome minister demisionario, Evelyn Wever-Croes, el a informa tocante e situacion financiero actual di Pais Aruba despues di tur e dificultadnan ocasiona pa pandemia di Covid-19.

“E efecto financiero riba nos pais ta enormemente grandi, eynan si nos ta leu di recuperacion”, Wever-Croes a comenta. El a indica cu e prioridad ta e aspecto di salud di cada persona, sigui pa e aspecto economico di cada persona, y awo ta bay na e aspecto financiero.

“Cada kwartaal keto bay nos ta depende di sosten di likides di Hulanda. Nos entradanan di belasting no ta suficiente pa cubri tur nos gastonan”, el a informa. “P’esey aworaki nos ta preparando e peticion pa asistencia financiero –di likides– di Hulanda pa e di tres kwartaal di e aña aki. Dia 1 di juli nos mester di e sosten aki pa juli, augustus y september, pues den juni e peticion aki mester wordo aproba pa Rijksministerraad.”

El a indica cu e medidanan cu ta implementando pa cumpli cu e condicionnan di Hulanda pa ricibi e sosten di likides en cuestion ta keda na vigor, ‘manera Hulanda mes a bisa, tot nader orde’. “Akinan mi ta referi na e parti di cortamento di salario di empleadonan publico y semi-publico.” El a informa cu e placa pa vakantieuitkering di empleadonan publico ‘t’ey caba pa wordo paga’. Ambtenaarnan lo ricibi mita di e vakantieuitkering igual cu aña pasa. Salarionan tambe ta garantisa, segun Wever-Croes, ya cu a ricibi e placa pa esaki den e segundo tranche pa e di dos kwartaal.

Mientras tanto ta sigui na mesa cu Hulanda riba e landspakket, COHO y RAFT. “Loke nos ta purbando ta trece stabilidad y trankilidad den cada hogar”, el a comenta. “P’esey aworaki ta momento tambe cu nos ta constata cu nos a logra stabilidad, nos a logra e trankilidad, y aworaki nos ta cuminsa flexibilisa.”

Sinembargo, Wever-Croes a adverti cu e virus SARS-CoV-2 ‘t’ey ainda’. “Den ultimo aña tras di lomba, e virus cruel aki a costa bida di 107 persona aki na Aruba.” Mester recorda e personanan aki y nan famia, y asina sigui cuida maske ta parce cu e virus ta domina.