Conseho di Minister di Reino ta keda cu derecho pa desvia di conseho si tin interes mas pisa; Senado Hulandes lo trata e rijskwet geschillenregeling dia 1 di Juni

Eerste Kamer lo trata e rijkswet geschillenregeling dia 1 di Juni venidero. Si mester acepta e ley, articulo 12a di Statuut lo haya su contenido. E articulo ta determina cu pa medio di rijkswet ta tuma pasonan pa trata diferencianan entre Reino y partnernan.

E proposicion di ley ta inclui cu e determinacion di existencia di un diferencia den interpretacion ta sosode durante un consulta continuo. Si despues di e consulta ta keda obhecionnan, e Minister Plenipotenciario por declara cu e diferencianan di interpretacion ta sigui existi y e ora por pidi un opinion di e seccion di Raad van State cu ta trata Disputa den Reino.

Presidente di Conseho di Minister di Reino por dicidi pa rechasa e peticion aki si e interes di Reino ta rekeri esaki. Den un caso asina, e Minister Plenipotenciario cu a expresa e diferencia di opinion, lo por bolbe haci peticion na e seccion di Raad van State, pa asina haya oido.

E disputa por tin di haci cu cualkier decision di Conseho di Minister cu excepcion di decisionnan of intencion pa tuma decision cu ya caba tabata sosteni pa un rijkswet of un aslna yama algemene maatregel van rijksbestuur. Of, si e proposicion di rijkswet of temanan di algemene maatregelen van rijksbestuur, of e decisionnan of proposicion di decision cu ta basa riba un areglo special, por keda presenta na Raad van State.

E seccion Disputa den Reino di Raad van State lo huzga e peticion y pone su conclusion por escrito y presenta esaki na Minister pa Asuntonan Interior y Relacion di Reino, cu despues ta informa tur partido envolvi. E conseho di Minister di Reino ta sigui e conclusion di Raad van State, a lo menos cu esaki no ta bay contra di un interes mas halto, of cu no ta asina cu a bin circunstancia y hechonan relevante despues cu a entrega e peticion, cu ta impulsa na un decision cu ta desvia di e conseho di e seccion Disputa den Reino di Raad van State.

E decision final, como tambe e opinion di e seccion aki lo keda publica na mesun momento den Staatscourant, a lo menos cu ley ta permiti pa no publica esaki. Den caso cu ta desvia di e conseho di e seccion di Raad van State, Conseho di Minister di Reino tin e obligacion pa publica pakico ta desvia di e opinion.

E proposicion di e rijkswet Disputa den Reino ta inclui un stipulacion cu lo bin un evaluacion riba su eficiencia y efectividad den practica despues cu e rijkswet drenta na vigor.

Mester bisa cu mayoria partido den Tweede Kamer a apoya e rijkswet aki. PVV y FVD a vota contra.

E Comision pa Relacionnan di Reino di Eerste Kamer, KOREL a ricibi e informacion di contestanan riba 9 di April ultimo y dia 28 di April a trece su relato. Den fin di siman pasa a ricibi e nota cu ta a base di e relato traha. E debate plenario pues lo tuma luga riba 1 di Juni 2021, den presencia di Presidentenan di Parlamento di e paisnan Caribense den Reino ademas di delegadonan di e tres Parlamentonan.