Ayera atardi a keda conoci cu algun medidanan cu a wordo implementa pa evita plamamento di Covid-19 a wordo elimina, asina a expresa prome minister demisionario Evelyn Wever-Croes durante un conferencia di prensa.

El a menciona cu ora nan ta mira e cifranan di casonan di Covid-19 activo y e grado di vacunacion na Aruba, nan ta mira cu pais ta drentando den un etapa nobo.

Na e momentonan aki tin 67 caso activo te cu e cifranan di diadomingo ultimo y esey ta indica cu tin un averahe di nuebe caso nobo pa dia den ultimo siman aki, esey ta indica cu ainda e virus t’ey pero e ta plamando hopi menos.

Esey tambe ta indica den e positivity rate cu ta 8% den ultimo siman y cu ta bin for di tur e test cu ta wordo haci.

E otro indicador ta hospital, na unda te na e momentonan aki e cifranan ta informa cu tin 14 persona den hospital, 4 den unidad di cuido intensivo y 10 riba piso general y hospital ta continua cu su servicionan regular.

E otro indicador ta e grado di vacunacion segun loke prome minister a enfatisa, ultimo fin di siman comunidad a wordo convoca pa un Vacunathon number dos na e cuatro localidadnan como Centro Deportivo Libertador Betico Croes, Club Don Bosco, Santa Teresita Center y Ritz Carlton Hotel den cual 8.474 persona a wordo vacuna, di esaki 1.809 a haya nan prome dosis y 6.665 a haya su di dos dosis.

Aworaki e grado di vacunacion pa Aruba ta na 62% e cual ta pone cu ta bayendo den bon direccion, segun loke prome minister a expresa y cu e meta ta pa yega na 85% di e poblacion total cu tin cu vacuna.

Cu tur e informacion aki, Gobierno di Aruba a dicidi tuma e pasonan pa bay back na normalidad y flexibilisa mas e reglanan cu nan a bin implementando, pa cuminsa for di mañan 25 di mei toque de queda ta wordo elimina pa via cu no tin espacio ni hustificacion mas pa e medida aki sigui na vigor.

Di mesun manera, gebiedsverbod riba beach y riba rif tambe ta wordo elimina pero riba tereno publico si lo keda vigente y ta cuminsa 7or y mey di anochi, prohibicion di alcohol riba caminda publico tambe ta keda existi.

Di loke ta trata orario di ciere di establecimentonan, prome minister a informa cu ta keda pa 11or pa tur establecimento cu excepcion di casino, pa casino e orario di ciere a hala pa 1or di marduga, pa Lotto tambe ta conta e orario te cu 8or y mei di anochi.

Comercio cu tabatin cu e capacidad di 50% ta bay back na normal, loke ta nifica cu por ehemplo gym of botonan di charter cu tambe tabata poni na un capacidad maximo di 50%, aworaki nan por bay back na e capacidad normal, e decision aki tambe ta conta pa supermercadonan.

Tapaboca lo keda vigente un tempo mas manera prome minister a sigura, pa motibo cu aworaki tin 62% so di e poblacion vacuna y si nan ta kita e exigencia di tapaboca esey no por wordo controla na momento di haya sa si algun personanan ta vacuna of no.