Minister demisionario di Enseñansa Armando Rudy Lampe pa Skoa: “¿Ta cuanto biaha hues mester dicta sentencia pa nan por compronde?”

Ayera mainta durante un conferencia di prensa di minister demisionario di Enseñansa, Ciencia y Desaroyo Sostenibel Armando Rudy Lampe a wordo treci dilanti loke ta trata un veredicto di hues den caso contra Skoa cu a bolbe duna minister di Enseñansa e rason, segun loke el a expresa.

Di esaki, el a señala tambe cu el a purba di reuni varios biaha cu Skoa pero esey no por a logra pa motibo cu nan tabata cancela segun loke el a menciona y ademas cu nan a dicidi di reuni cu prome minister demisionario Evelyn Wever-Croes na unda el a sigura cu “prome minister no por tuma decisionnan pa Ondewijs, ta e minister van Onderwijs esun autorisa pa tuma decision pa tur loke ta Onderwijs”, el a declara.

Di e veredicto Lampe a afirma cu “there is somethin wrong” cu Skoa, pa motibo cu un biaha mas hues a bisa cu Skoa a actua contra ley y loke nan ta trece dilanti cu nan no por cumpli cu e obligacionnan, cu nan no tin suficiente placa pa paga tur empleado di limpiesa no ta pa falta di subsidio di gobierno segun loke Lampe a comenta, “esey ta falta cu nan no kier cumpli cu ley, pasobra si bo ta cumpli cu ley no tabatin e problema aki y contra ley nan a duna nan e status di ambtenaar”.

Den mesun linea, Lampe a expresa cu nan no por pidi mayornan pa cubri e placa pa loke nan ta haci fout, “¿ta cuanto biaha hues mester dicta sentencia pa nan por compronde cu den Aruba tin un estado di derecho y bo tin cu cumpli cu ley? ”, el a enfatisa.

Tambe, el a trece dilanti cu den e caso aki ora cu nan a pone e central accounting traha un rapport den cual nan a mira cu algo a bay robes, “den e rapport a bin sali mas puyito, anto eynan parti di e sentencia ta bay ariba” pa motibo cu Lampe a menciona cu nan a haya por ehemplo, pagonan dobel di salario y cu normalmente lunanan pasa e tabatin e caso di un directiva di scol cu pa via di un fout humano nan a ricibi pago dobel di departamento di Finansa.

Ora cu e rapport a ripara esey nan a bay corte y hues a duna Lampe rason den sentencia aki, e conclusion ta e ora ey cu “there is something wrong” y ta p’esey cu nan a bisa for di inicio cu finansa mester ta na ordo, vooral pa Skoa y cu hues den e veredicto a menciona cu ministerio a pone placa extra, loke ta nifica cu no lo mester tin ni un problema pa e trahadonan por keda cu nan trabou y cu no mester tin ni un problema cu limpiesa di scolnan, simplemente Skoa mester actua conforme ley.

E motibo pakico e kier reuni cu Skoa ta pasobra e lo bisa nan cu na aña 2022 lo tin un aumento di subsidio pa cada mucha den enseñansa, “cu ki base bo ta bay aumenta schoolgeld y cu ki base bo ta bay pidi mayornan mas placa pa cada mucha si ya gobierno lo aumenta subsidio pa cada mucha for di 2022?” el a finalisa.