E aña nobo no a cuminsa cu un ‘fresh start’ pa e habitantenan di Simeon Antonio, bibando cerca di e dump Parkietenbos. Ya un par di dianan huma ta sali atrobe molestiando nan, mientras di otro banda no tin bista ainda riba un solucion manera gobierno a priminti na november 2016.
E luna ey prome minister Mike Eman a bisa cu lo bay cera dump entrante di januari. E prome paso ta pa bin cu un solucion pa stop cu e dump ta crece mas. Esta cu Ecotech/Ecogas lo tuma e parti di procesa e sushi di cas over di Serlimar. Aunke esaki a conduci na accion bou personal di Serlimar, gobierno a indica cu lo sigui negosha cu e compania Ecotech. Pero despues di mas cu un luna no a tende mas di e plan aki.
E problema di e dump ta cu, basicamente no tin espacio mas. Pa motibo di esey Serlimar mester kima sushi pa asina crea mas espacio riba e dump. Banda di esaki, tin hopi sushi organico riba e dump y tambe otro sorto di desperdicio di hospital, construccion y kimico. Esaki ta causa candela den un forma spontaneo. Asina e habitantenan di e bario ta keda cu e molester y daño di huma pa nan salud. Nan kier cu Serlimar ta maneha e dump na un miho forma.
E habitantenan den e bario a uni nan mes den dos grupo. Bo tin e grupo bou Stichting Parkietenbos cu a sinta na mesa cu gobierno aña pasa unda gobierno a indica cu lo bay cera e dump na 2017. Segun e fundacion aki nan ainda ta kere den un dialogo cu gobierno. Pero tin un otro grupo tambe cu a manda un carta pa gobierno y Serlimar unda nan ta exigi mas tanto pa percura cu no tin candela mas riba e dump. Y tambe ta para e compania y gobierno responsabel pa cualkier daño pa salud. Den e caso gobierno ta keda sin contesta, nan ta prepara pa tuma pasonan legal.
E rol di Ecotech
Awor e compania Ecotech tambe ta dump su sushi na Parkietenbos. Esaki no tabata e plan original ora nan a habri e planta Ecogas na 2014. E planta aki mester suministra gas pa WEB, gas traha for di sushi. Sinembargo Ecotech/Ecogas te awor no a logra di stabilisa e proceso aki den un forma cu por cuminsa procesa e sushi. Patras di e planta por mira e creacion di un otro dump tambe.
E plan di gobierno ta cu lo cera e dump y pa Serlimar banda di e planta di Ecotech/Ecogas haya diferente luganan unda por procesa sushi. Esaki den forma di kimamento tambe. Locual gobierno kier yega mas pronto posibel ta cu Ecotech lo tuma over e parti di procesa e sushi di cas. Tanten cu Ecogas no ta traha, e compania mester percura pa e sushi lo wordo separa (locual awor no ta haci 100% na dump di Parkietenbos) y manda locual por, afo.
Pero esaki ta costa placa y no por mira niun evidencia, manera den e presupuesto pa 2017, cu gobierno a reserva placa pa esaki.
