Fundacion pa Gobernacion di Calidad a cuminsa na Aruba na aña 2016. Den e ultimo 5 aña e fundacion a haci un analisis di e calidad y situacion di gobernacion na Aruba. Armand Hessels, presidente di Fundacion pa Gobernacion di Calidad, ta duna di conoce cu prome cu cuminsa actua mester haci un analisis di e manera con ta hiba gobernacion na Aruba.

E tempo cu e pasa a dedica atencion, tempo y energia na e elaboracion di seis rapport hopi importante pa Aruba, cu ta e maneho di personal, administracion financiero,transparencia , funcionamento di parlamento, maneho socio economico y integridad. Tur e seis puntonan aki ta presenta cada bes den cualkier raporta cu ta keda traha, p’esey mes a usa e seis puntonan como enfoke pa analisa.

Segun Armand Hessel comienso di aña pasa e fundacion a cuminsa y a caba cu e ultimo rapport , pero como cu ta conoci cu masha tiki hende na Aruba ta gusta lesa y e fundacion a dicidi di traduci tur e rapport den video unda cu a traha 12 video cu ta mustra hende a base di cartoons y texto hopi facil pa compronde con e gobernacion na Aruba tabata y kico tabata e enfoke y e mal gobernacion cu tabatin.

E fundacion a compara e gobernacion manera un famia y un empresa mester funciona pa por resta placa y por bay dilanti. Alabes a mustra tambe con gobierno mes ta atende cu e tipo di puntonan aki. Na momento cu un persona mira e video nan aki, nan lo keda babuca debi cu nunca nan no por a imagina con malo e situacion ta, segun presidente di fundacion pa gobernacion di calidad Armand Hessels .

Como ultimo paso e fundacion a tuma e iniciativa pa haci un analisis hopi mas profundo cu hopi mas experticio riba e funcionamento di Aruba su identidadnan principal pa vigila integridad. E fundacion a pone e investigacion aki den man di un grupo na Hulanda cu ya caba tin experiencia den e investigacionnan aki pero cu ta bao di guia di Willeke Slingerland cu par di aña pasa a participa den e prome simposio cu a keda organisa na Aruba.

Sinembargo ya caba Willeke Slingerland a haci e analisis aki na Hulanda unda cu e la keda bon prepara pa por haci e tipo di trabao nan aki y a hacie den practica na Hulanda y a base di e experiencia cu e tin a haci peticion na su persona pa a haci e mes un tipo di analisis aki pa Aruba pa asina e fundacion por caba cu e prome fase di trabao como fundacion.

Segun Armand Hessels loke cu a ricibi basta atencion ta e echo cu pa trece henter e concepto di bon y mal gobernacion na Aruba den e discusion di comunidad a organisa te cu awor dos simposio, uno ta pa splica di e consecuencianan di mal gobernacion y e otro simposio cu tabata un exito total tabata e simposio di aña 2019 na unda cu a haya e colaboracion di prome minister di Aruba , presidente di banco central , lider di fraccion di partido MEP , procurador general cu a duna di conoce cu pakico bon gobernacion ta asina importante y e efecto positivo cu e ta bay haci riba comunidad y naturalmente e necesidad e ora ey pa elimina e mal gobernacion ta asina importante.

Segun Armand Hessel den e presentacion di e presidente di banco central e tempo ey por a ripara cu e percepcion di corupcion den pueblo di Aruba ta masha halto mes. E tempo ey a menciona e cifra di 75 pa 80 porciento y a ripiti e mes un encuesta dos tres biaha mas y ultimamente e percepcion ey a subi te casi 100%, esey kiermen cu na Aruba hende ta convenci cu corupcion ainda ta manda den gobernacion. Segun Armand Hessels esey ta algo sumamente negativo. Den e caso aki por tuma nota cu gobierno ta reconoce e parti aki tambe.

Segun Hessels no ta pornada e gobierno di cualicion a pone como su enfoke principal “ Bon gobernacion, transparencia y integridad” . Pa fundacion gobernacion di calidad esaki ta hopi importante debi cu pa prome biaha un gobierno ta pone como meta bon gobernacion como su enfoke principal. Sinembargo tin un diferencia masha grandi mes entre palabra y echo , e echo cu ya caba nan ta us’e den palabra ta mustra un bon comienso. Segun Hessels si esaki realmente ta wordo converti den echo , esey ta tuma un caminda basta largo.

Un ehempel cu Hessels a duna ta cu e por a tuma nota cu basta fanfaria e gobierno actual a bin cu e iniciativa cu ‘’Porfin ‘’ despues di mas di 30 aña realisa e ley di financiamento di partido politico. Loke cu a tuma nota ta cu berdad a bin un ley di iniciativa pa financia partidonan politico y na unda cu hasta a discuti esaki den parlamento e la keda aproba , pero kico por a tuma nota di dje ta cu e ley ey no tin ningun djente.

Segun Hessels den e ley a pone como control di e finanzas di partido politico ta cay bao di responsabilidad di conseho electoral , segun Hessels e problema ta cu esunnan cu a traha ley aki ni sikiera e delibera cu conseho electoral. Banda di esaki conseho electoral no tin ningun secretariado , no tin e finanzas pa haci e control, esey kiermen cu nan a pone un tarea den scochi di conseho electoral mientras cu conseho electoral no tin niun placa y tampoco niun instrumento pa ehecuta e mandamento di ley, Segun Hessels cu otro palabra e partidonan por sigui mescos cu antes na unda cu sa caba cu nan ta hayando placa di e mundo baho unda cu tin un ehempel grandi unda cu lider di partido AVP a haya mas cu 50 mil dollar di parti di Roberto Rincon. Cu esaki ta kere cu e situacion aki ta sigui tuma luga na un nivel hopi mas amplio.

Segun Hessels tanten cu e ley no tin djente di berdad ta kere cu lo sigui cu e parti di placa di campaña for di fuentenan criminal sin cu ningun hende por haci algo al respecto. Esaki ta un di e partinan cu fundacion pa gobernacion di calidad te ainda bon gobernacion ,integridad,transparencia ta keda na palabra debi cu den su efectividad nada no a pasa ainda.