(AP) – Hopi hospital tin cambernan yen, y e lista di espera ta yena mas cada dia, esaki ta causando cu hoben y adultonan buscando ayudo pa desorden alimentario, tin cu warda luna largo pa por haya un afspraak.
E pandemia ta creando circunstancia ideal pa desaroya desorden alimentario, creando un aumento den caso nobo diario, y recaida pa pashentnan cu ya a recupera cu no ta bahando cu e cambio di restriccion pa cu COVID-19.
“Nos ta mirando un aumento sumamente grandi” Jennifer Wildes ta comenta, ken ta un profesor di Psikiatria y director di un programa pa desorden alimentario na University Of Chicago Medicine. Algun di e pashentnan ta warda 4 pa 5 luna pa por haya tratamento manera psicoterapia y medicina, mientras cu prome cu e pandemia, e tempo di espera tabata solamente 2 pa 3 siman largo.
E programa ta tratando cu mas o menos 100 pashent, cual ta dobel di e cantidad cu tabatin prome cu e pandemia a cuminsa. “The Emily Program” tambe ta experenciando e mesun situacion. Yamadanan diario ta drenta, aumentando di 60 den 2019, pa 130, despues cu e pandemia a cuminsa.
“Nos ta consciente cu ansiedad y distanciamento social ta tipicamente factornan clave pa e desaroyo di desorden alimentario.” Jennifer ta bisa.
Algun pashent ta bisa “mi bida ta sinti fuera di control” pa motibo cu e pandemia ta causa cu pa algun, come excesivamente ta bira un manera di por sobrepasa e situacion, mientras cu pa otro, e miedo di aumenta peso ta haci cu nan ta haci dieta extremo, asina tur dos tipo di persona ta desaroya desorden alimentario.
E programa ta ofrece tratamento personal pa e pashentnan, pero tambe tratamento a larga distancia pa e pashentnan cu ta biba den diferente ciudad, cu pa causa di e pandemia a cambia pa tele-terapia, cual ta duna via yamada telefonico.
“Nos por wak un aumento tur caminda”, cu pashentnan di tur edad, y di un variedad grandi di luga, hasta den muchanan chikito. Esaki ta inclui miembronan di e comunidad “LGBTQ”, cu hende muhe y mucha muhe hoben siendo e cantidad mas grandi afecta.
Peyton Crest, un mucha muhe di 18 aña, ta conta cu el a desaroya anorexia prome cu e pandemia y a recupera, sinembargo, desde cu e pandemia a cuminsa, a experiencia 2 recaida caba. E tabata sufri caba di ansiedad, y debi na e presion cu el a sinti ora cu scol a bira online, y e mester a practica distanciamento social, el a sufri recaida.
“Mi tabata den mi ultimo aña, cla pa cuminsa mi carera universitario” Peyton ta conta, ora cu diripiente e mester a aleha di su amistadnan pa motibo di reglanan di distanciamento social, kendenan tabata su sosten durante su proceso di recuperacion. Na e momento cu el a encontra su mes su so tur dia, el a cuminsa experiencia desorden alimentario, y a bolbe cay den anorexia.
Danki na e insistencia di su mayornan, el a logra haya tratamento local na juni di aña pasa, pero lunanan despues na september, a bolbe sufri un recaida, y a pasa casi 2 luna den un centro di rehabilitacion.
Aunke Peyton a recupera, e ta un di e miles di caso cu Wildes ta ricibi den su programa, y aunke e pandemia posiblemente ta mirando su fin, e casonan no ta bahando. “Te ainda hendenan no por logra cay back den nan rutina anterior” y esaki ta causa cu e casonan di desorden alimentario lo keda aumenta.
“The Alliance For Eating Disorders Awareness”, cu a cuminsa ofrece ayudo virtual pa pashentnan durante e pandemia, tambe a mira e aumento aki, subiendo pa un cantidad di mas o menos 7,000 pashent den 32 diferente pais. “E ta algo cu nunca nos no a yega di mira” e president di e organisacion, Johanna Kandel ta bisa.
“E pandemia di COVID a causa problemanan psicologico hopi grandi na nos sociedad, y particularmente na e hobennan. E ta un evento grandi, cu a impacta y cambia e bida di hopi hende den hopi maneranan diferente, y posiblemente e lo tarda añanan, prome cu nos por wak e gran impacto cu e pandemia lo laga den nos sociedad.” Dokter Dave Little, un dokter di cas ta comenta.
Dave Little ta bisa cu e aumento den e casonan aki mester alerta tanto mayornan como e dokternan, pa por combati e aumento aki, y por yuda e personanan cu lo posiblemente desaroya un desorden alimentario.
Dokter Little ta conseha pa nos “Papia cu boso yiunan, papia cu boso mayornan. Sigura boso mes, cu e habitonan di alimento ta uno sano y apropia, pa asina cu bo ripara algo no ta bayendo bon, bo por reporta esaki na e personanan adecua.”
