Un miyon vacunacion no registra por retrasa paspoort di vacunacion Europeo

(NLTimes) – E retraso den registracion di vacunacion di Covid-19 probablemente ta bay complica introduccion di un paspoort di vacunacion Europeo, segun Nieuwsuur a reporta. Actualmente, RIVM ainda no ta al dia cu e cantidad total di vacunacion na Hulanda, manera minister demisionario di Salud, Hugo de Jonge tambe a reconoce.

“Manera ta den tradicion Hulandes, tin 38 sistema unda ta registra vacunacion di coronavirus. Tur esaki mester yega na RIVM. Esey ta un trabao dificil”, De Jonge a bisa segun NOS.

Alrededor di 8,181,811 vacuna a keda administra desde inicio di e programa di inoculacion na januari, segun cifranan di RIVM diasabra.

Te awo, apenas mita di e vacunacionnan ehecuta pa dokternan di cas a wordo registra cerca RIVM. Adicionalmente, menos di mita di e hanguanan cu a ser administra den institucionnan di cuido di salud no a wordo hinca den sistema central di RIVM (CIMS). Esaki ta conta pa alrededor di un miyon di hangua cu no ta inclui den data di RIVM.

Asociacion Nacional di Dokter di Cas (LHV) a bisa cu e sistemanan di e dokternan di cas ta conecta cu RIVM, y pues ta transferi automaticamente. RIVM a declara, di otro banda, cu e data ainda ta falta. No ta cla te awo kico ta e causa di e retraso.

“Dokternan di cas ta registra e vacunacion den nan sistema di informacion existente. NO a bisa nan pa cumpra of instala un sistema nobo. E vinculo entre esun existente y RIVM a keda

Regla pa e proveedornan di e sistema y e agencia di salubridad publico. Te unda cu nos sa, e punto aki no ta un problema”, un vocero di LHV a bisa.

E codigonan QR pa e pase di vacunacion Europeo ta casi cla pa wordo usa y por keda introduci pa comienso di juli, sinembargo, si e data ta incompleto, e sistema nobo no lo ta precies.

Actualmente un task force ta trahando riba actualisa e retraso den registro di vacunacion. Alrededor di cinco pa dies porciento di hangua no a keda registra pasobra hende no a selecta den e formulario pa pasa nan data na RIVM. Hopi no tabata na altura cu esaki lo nifica cu nan no ta ricibi un codigo QR Europeo cu lo facilita biahe entre paisnan. “Ainda nos mester bin cu un solucion, pero esey por dura un tempo”, De Jonge a bisa. No ta cla si e retraso lo keda rectifica pa fin di juni.