Ayera tardi prome minister demisionario Evelyn Wever-Croes a comparti riba rednan social potretnan di un reunion cu Sr. Sean Lalani, presidente di Eagle LNG, hunto cu director di RdA, Sr. Renny Arends.
Manera Bon Dia Aruba a reporta, na december e companianan Eagle LNG y Quanten LLC a firma cu Refineria di Aruba pa sigui cu negociacionnan, pa asina mira si ta yega na acuerdonan pa Quanten LLC di su banda traha riba e reapertura di e refineria y Eagle LNG riba un proceso/desaroyo nobo. E tempo aya, Wever-Croes a splica cu unabes e acuerdo concretisa completamente, RdA lo no bay cumpra mas heavy fuel oil pa por ehempel WEB, sino gas pa WEB por bay opera riba gas. Segun Wever-Croes, esaki tin hopi beneficio cune manera entre otro e prijs ta stabilisa, prijs di awa y coriente por baha y e tin beneficio pa medio ambiente tambe pasobra gas ta mas limpi cu heavy fuel oil. Ademas e ta trece desaroyo economico cune. E compania ta establece su mes na Aruba crea mas cupo di empleo y considerando e compania su plan pa traha tambe mas den exportacion. Esaki lo yuda nos reserva di divisa, crecemento economico y mas entrada pa Gobierno.
Tocante e reunion ayera, Wever-Croes no a duna mucho informacion, compartiendo solamente cu a reuni ‘riba e proyecto nobo cu nan kier trece Aruba. Un proyecto cu lo genera un desaroyo economico nobo y unico, cu lo genera cupo di empleo, y cu lo por baha prijs di awa y coriente’.
