Ministerio di Asuntonan Interior di Hulanda tin un liaison special pa Aruba awor y su nomber ta Ruben Goedhoop. E ex Director di AZV a confirma na Bon Dia Aruba cu e awor ta e persona encarga pa e reformanan na Aruba na e Ministerio di Asuntonan Interior y Relacionnan den Reino.
Manera ta conoci, aña pasa Minister di Salud Publico Dangui Oduber a suspende sr. Goedhoop for di AZV na Juni. Esaki despues cu e Minister a expresa su indignacion cu Sr. Goedhoop a extende e contrato cu Lite Life Medicab cu tabatin añanan ta duna servicio di transporte na pacientnan cu mester di dialyse. Mientras cu nunca a bin un splicacion oficial, finalmente Ruben Goedhoop mester a bay for di AZV cu un compensacion grandi, y e trabou di transporta pacientnan pa nan dialyse a pasa pa DVG. E personanan cu a haya e encargo tabata personal cu tabata traha na despacho di e Minister.
Ironicamente, e mesun persona cu mester a bay for di AZV pa motibo di a haci algo cu Minister Oduber no a keda contento cu n’e, awor ta e representante di e Ministerio Hulandes bou cua COHO ta bay resorta. Y un di e condicionnan principal cu Aruba a compromete cu n’e den e landspakket ta reforma di aparato publico, reforma fiscal y reforma di mercado laboral.
Goedhoop, RA, siendo di Aruba y ta bin di e mundo di accountancy, sigur maneho y control fiscal ta un persona cu hopi conocemento cu awor lo tin un responsabiidad special na Hulanda pero cu ta dirigi na su isla natal.
