Ayera, Departamento di Salubridad Publico di Aruba DVG a informa cu nos isla lamentablemente a conoce un fayecido mas pa Covid-19, loke ta aumenta e total di fayecido relaciona cu e malesa na nos isla na 106.
DVG a manda palabra di condolencia na famia y sernan keri di e fayecido. E Departamento no a duna mas detaye riba e fayecido.
Den otro informacion relaciona cu e desaroyonan di pandemia, segun resumen di ayera di DVG, 12 persona a recupera di Covid-19, mientras cu a registra un total di 13 caso nobo di infeccion di e virus SARS-CoV-2. Tur esakinan ta entre residente. Cu esaki, e cantidad di caso activo ayera a keda na 70.
E cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 449 test. E tasa di positividad, (‘positivity rate’) entre nos residentenan ta 14%, loke ta mustra un aumento relativamente grandi.
Di su banda, Hospital Dr. Horacio Oduber a informa cu tin un total di 18 persona interna den hospital pa ricibi tratamento pa Covid-19. Di e personanan aki, siete ta den Unidad di Cuido Intensivo ICU, mientras 11 ta isola riba unidad general di Covid.
