Un di cada 11 residente di Aruba ta depende di pakete di cuminda y entrante Juli, Aruba mester asumi responsabilidad pa carga cu e gasto y logistica, despues cu e sosten di Hulanda pa medio di Rode Kruis ta yega na su fin.

Pa tal motibo mes Prome Minister Evelyn Wever Croes ayera a pidi pa haya pensamento di Parlamento di Aruba pa aloca 14 miyon pa continua cu e sosten di cuminda te cu fin di December.

Manera ta conoci Hulanda a asumi e gasto pa yuda cu cuminda pa esnan afecta pa e crisis di COVID-19, incluso residentenan indocumenta, cu a keda sin posibilidad pa traha y hasta haya FASE. Un di e condicionnan pa Aruba por a haya e di cuater tranche di sosten di likides tabata cu Aruba mes lo asumi e gasto aki entrante prome di Juni 2021. “E condicion ta pisa, pero nos no por a nenga e di cuater tranche,” Prome Minister Wever Croes a splica.

Consecuentemente a trece hunto Buro Rampenbestrijding Aruba, BRA, hunto cu Fundacion pa Nos Comunidad, FPNC, y Direccion pa Asuntonan Social pa traha un plan con pa hinca e ayudo aki den otro y a presenta e plan aki na e Grupo di Trabou Temporario, TWO (Tijdelijke Werkorganisatie) encarga cu e landspakket pendiente e creacion di COHO.

Hulanda a indica di ta dispuesto pa sigui financia Aruba cu fondonan pa cubri e necesidad di cuminda, pero a pone otro condicion, esta cu mester acepta un ‘onderlinge regeling.’ Esaki ta un paso cu ta duna Hulanda mas di bisa, ya cu e ta regla via articulo 38 di Statuut. Evelyn Wever Croes a informa Parlamento cu no a acepta e condicion aki pero cu a sigui negocia cu Hulanda y ta mustra cu tin espacio. “Gobierno no a mira e necesidad di un otro ‘onderlinge regeling’ mirando cu henter e sosten di likides ta basa caba riba un onderlinge regeling.”

Pero mientras cu ta negociando cu Hulanda riba e termino con por haya fondo pa cubri e necesidad di cuminda te October, no por sinta keto. Pasobra e organisacionnan mester di e fondonan awor pa cuminza cumpra e cuminda pa asina por reparti esakinan entrante prome di Juli. Si mester warda te ora cu yega na un palabracion diferente cu Hulanda, lo bin un buraco den e ayudo y esey lo ta un desaster pa famianan cu mester di e paketenan di cuminda. “Y unabes cu keda cla cu Hulanda, lo no mester di e 14 miyon completo cu nos ta pidi Parlamento p’e.”

Prome Minister a informa e Parlamentarionan cu motibo cu a pidi pa e suma total di 14.2 miyon florin, ta pa evita cu cada biaha mester bolbe pidi pa e 4.7 miyon necesario pa tres luna di cuminda. Y si Parlamento ta de acuerdo cu 4.7 miyon, e no ta spera cu Parlamento lo nenga e otro parti di e suma necesario.

Evelyn Wever Croes ta enfatisa cu e ayudo di cuminda aki ta un temporario y ta mara e crisis. P’esey e tin un fecha cu ta termina tambe. “Tin un obligacion moral pa yuda esnan cu ta pasando den necesidad y yuda den e transicion pa nan mes para riba nan mesun pia, cu nan mesun forsa.”

Parlamento ta comparti preocupacion

E Parlamentarionan presente a mustra comprension pa e situacion y lider di fraccion di AVP a puntra Prome Minister ki tempo Gobierno lo ta cla cu su contestanan pa trata Presupuesto pa asina por duna aprobacion pa e 14.2 miyon florin, destina pa e ayudo. Segun Wever Croes, ta finalisando e contestanan por escrito y pronto lo por spera esakinan pa Parlamento por trata Presupuesto 2021.

Pero e tabata obvio cu hopi Parlamentario tabata preocupa cu e forma con por yuda famianan den necesidad sin cu tin hende ta saca probecho, unda a hasta referi con Rode Kruis a dicidi pa usa vouchers pa motibo cu tabatin caso di hende cu tabata bende e productonan. Ademas tabatin pregunta cuanto di e grupo cu ta haya ayudo di Rode Kruis ta personanan no-residente. Aunke cu no tin cifranan fiho pasobra no a registra esnan cu mester di ayudo basa riba nan status legal, Rode Kruis ta calcula cu entre 45 pa 65 porciento di tur e paketenan di cuminda ta bay pa personanan cu no tin un status legal na Aruba. Pero no tin otro opcion cu no ta sigui yuda nan, “pasobra nos no kier pa hende muri di hamber na Aruba,” Prome Minister a comenta.

Otro preguntanan tabata riba e posibilidad pa sigui yuda personanan cu ta cobra apenas parti di un pensioen y no tin suficiente fondo pa paga un cas y sobrevivi. “E necesidad pa yuda hende a subi di 250 pa 5000 famia pa motibo di e crisis. Mi ta kere cu nos tur ta sinti cu e sosten aki ta necesario y importante. Nos no tin un ‘choice,’” ta locual Prome Minister a bisa Parlamento.