Trabaonan di construccion na Aruba Ocean Villas ta para pendiente e caso sumario cu Fundacion Parke Nacional Arikok y Stichting Fundacion Proteccion y Conservacion di Commandeursbaai y Vecindario a entama contra e operadonan y tambe Pais Aruba.

Na comienso di e siman aki, abogadonan pa e dos fundacionnan, Mr. Rep y Mr. Arendsz -Marchena a presenta un peticion pa un caso sumario na Corte pa para tur actividad.

E keho tabata contra pais Aruba y J.O.B Leisure & Events VBA y J.O.B. Holding & Management VBA.

E solicitantenan a pidi Corte dia 17 di Mei pa un caso sumario contra Pais Aruba y J.O.B pa para tur construccion riba su parcelanan na Savaneta. Ademas kier pa prohibi Pais Aruba pa duna permiso di construccion pa e parcelanan aki, y percura cu no tin ningun construccion.

E solicitantenan a pidi pa den cuadro di e caso sumario pa huez impone un asina yama orde maatregel, esta un orden, den sentido cu Corte por impone un paro di construccion te ora cu e caso sumario keda conclui.

A trata e peticion pa e orden aki dia 18 di Mei ultimo, den presencia di abogadonan. E representantenan di Gobierno tabata mr. Caster y mr. Kaarslaan y abogadonan di J.O.B ta mr. Ruiz y mr. Reinkemeyer.

Daño irreparabel

Solicitantenan a argumenta cu e trabao di construccion cu ta tumando luga a causa daño irreparabel na e balornan natural di e tres parcelanan cu ta den disputa. Ta trata un area di mangel cu ta parti di e area natural, maneha pa Fundacion Parke Nacional Aruba. Pues, segun e argumentonan, pa e motibo ey caba so, no por mishi nada den e parcelanan. Pa loke ta e parcelanan den lama y den e saliña, e argumento ta cu esakinan ta habitat pa especienan cu ta protegi pa leynan nacional y tratadonan, y no ta permiti pa mishi cu nan tampoco.

Pais Aruba y J.O.B. ta nenga cu e construccion cu a inicia a of ta haci daño irreparabel na naturalesa.

Huez ta haya cu tin indicacion di daño

Sinembargo, basa riba imagennan cu a mustra durante e sesion den Corte, a considera cu pa e momento aki e construccion cu ta tumando na e parcela di lama, ta causando daño. Mescos ta e situacion di e area di mangelnan. A pone un muraya di santo cu a saca afo di e area mes, y esaki ta afecta e mangelnan segun e solicitantenan. Den conexion cu ubicacion di e pilarnan pa e bungalownan den lama, a traha buraconan den e fondo di lama.

Segun Corte, Pais Aruba ni J.O.B. no a demostra suficientemente cu e daño cu ta haci na e area di mangel, no ta contra e obligacion di proteha e area. Tampoco a convence e huez cu e daño den e parcela di lama no ta causa daño na e flora y fauna di e area, cu ta protegi pa e leynan nacional y tratadonan.

No tin interes pa stroba un paro temporal di construccion

Pais Aruba ni J.O.B por a demostra suficientemente cu tin interes mas pisa, pa por permiti cu ta tolera continuacion di e construccion durante e caso sumario.

Riba dje, Corte a constata cu J.O.B. a mustra di a pidi pa e permisonan desde 2009. Pero cu Gobierno apenas a duna e derecho di construccion riba 12 di Maart 2021, y e permiso di construccion mes a keda cla di 1 di April 2021. Pues, Corte no ta mira pakico tin un interes pa J.O.B. sigui cu e construccion pendiente e decision di e Caso Sumario. E argumento di J.O.B di tin acuerdo cu contratistanan no a keda suficiente demostra, pasobra no a ilustra esaki concretamente cu lo tin efecto negativo si tin un paro, eventual posponemento di e construccion.

Pa loke ta e saliña, tanto J.O.B. como Gobierno a mustra cu lo no tin construccion den e area aki y no tabatin argumento riba e aspecto aki.

Gobierno no mag duna ningun permiso pendiente e caso

Huez Verhoeven a bisa cu basa riba e argumentonan presenta, evaluando interes di tur partido, particularmente di esnan cu a solicita e caso sumario, cu e peticion pa ordo di para e construccion mientras cu e argumentonan mes lo keda presenta den e caso sumario, tin su merito. Pues el a duna e ordo pa para construccion.

Tambe mr. Verhoeven a bay de acuerdo pa impone un multa den caso cu J.O.B. no sigui cu e orden cu el a duna. Pues, e huez den corto a instrui J.O.B. a para tur construccion den cierto parcelanan destina pa Aruba Ocean Villas, tanten cu no tin un sentencia.

No por haci ningun tipo di trabao, ningun tipo di actividad den e parcelanan 4-E-2550, 4-E-2523 y 4-E-2528, cu ta sea coba, move, saca of pone, of cualkier otro cu ta dirigi na construccion di un bungalow riba awa. Huez a impone un boet di 100 mil florin pa dia si no sigui cu e orden aki. Ademas a prohibi pais Aruba, pa tanten cu no tin sentencia, pa duna cualkier permiso pa e terenonan aki.

Reaccion propietario Aruba Ocean Villas

Segun Osyth Henriquez di Aruba Ocean Villas, J.O.B. lo sigui cu e instruccion di huez, pero cu e ta prepara pa e caso sumario. E ta sinti cu Stichting Fundacion Proteccion y Conservacion Commendeursbaai y vecindario ta un organisacion cu a lanta cu un solo meta, esta stroba su proyecto na Savaneta. “Nos no a mishi cu ningun mangel, ni esunnan cu ta riba nos tereno ni esunnan cu ta riba e tereno di Fundacion Parke Nacional Aruba.” Henriquez a bisa di ta cla pa mustra huez tur documento relaciona cu e proyecto.

E caso sumario mes ta tuma luga otro siman.