For di algun dia pasa nos por a mira un cantidad di flexibilisacion di medidanan relaciona cu pandemia Covid-19. Asina nos por a mira cu turistanan mester presenta un prueba PCR negativo pa por drenta Aruba; pero ora ta yega momento di diversion y restriccionnan, esaki no ta mucho claro.
Busnan di paranda ta conoci pa core rond henter Aruba cu musica y diversion, tanto pa hende local como pa turistanan. Den ultimo tempo por a ripara cu e busnan aki a genera un dilema entre comunidad, pa motibo di restriccionnan pa preveni plamamento di Covid-19, pero na mesun momento e diversion di esnan cu ta gosando riba un trip pa nan por keda mantene e reglanan.
Algun dia atras por a mira algun di nan cu tabatin casi 40 persona riba un di e busnan aki festehando, sin tapaboca y sin ningun tipo di distancia social. Bon Dia Aruba haci e pregunta na CEO di Aruba Tourism Authority (ATA), Ronella Tjin Asjoe-Croes durante un conferencia di prensa. El contesta cu “como ser humano, bao di hende local bo tin e tendencia cu bo ta mir’e, ‘mi ta full vacuna y mi ta full protegi kiermen, cu mi ta lag’e bay’. Nos por bisa cu for di operadornan nos ta haya e feedback cu ta hopi dificil pa implementa cierto regulacionnan, pero e regulacionnan ta keda vigente. Pues tin control y tambe tin task force cu ta conduci e control mas necesario. Si bo wordo controla y e situacion ta manera cu bo ta describie asina ey, sigur lo tin consecuencia pa e operador aki”, el a expresa.
Tjin Asjoe-Croes a declara cu di otro banda tambe por mira e comportamento di ser humano cu e mayoria di bishitante ta full vacuna, nan tin e tendencia mesun cos cu na Aruba di “laga bay un tiki”. Pero e reglanan ta keda vigente y control tambe ta sigui tuma luga, pa loke a ripiti cu esey lo por tin consecuencia pa e compania operador di tour.
“E ta un situacion cu operadornan tambe ta bisa cu ta dificil pa bo en berdad implementa cierto reglanan. E ta un realidad cu nos tur ta mira, pero mi ta kere cu ta hopi importante pa corda e cifranan di grado halto di vacunacion bao di bishitantenan, esey ta nifica tambe cu e riesgo ta menos. Nan por tin y transmiti e virus, pero nan ta protegi, y tambe mas nos proteha nos mes como poblacion, e ora ey menos e contagio ta bay tuma luga.”
E chauffeur di e bus tin e responsabilidad conforme di regulacionnan di loke reglamento ministerial ta regarda cu ta wordo decreta cada tres dia cu ta formula diferente di e reglanan. “Esey formalmente ta locual cu e tin cu cumpli cune, anto formalmente y esaki ta inclui tambe den e codigo den e programa di Health and Hapiness Code. Tur cos ta delinea eynan pa tipo di operadornan di bus, entre otro” Tjin Asjoe-Croes a declara.
Formalmente personanan tin cu keda mantene distancia di 1.5 meter y si no tin esey, tur hende e ora ey mester tin nan tapaboca bisti. Esey ta loke reglamento ministerial ta decreta cada tres dia y cu ta vigente ainda y ta inclui den e Health and Hapiness Code, e protocol cu gran parti di operadornan a pasa y a sigui proceso conforme loke nan tin stipula como maneho.
“Pero e reto ta keda pa aplica cierto cosnan. E reto ta keda comportamento di nos bishitantenan tambe y di nos banda, bo mester yega na e punto cu bo ta sigui flexibilisa. Y esey nos ta haya cu ta importante, ta prudente tambe y e ta hopi cla cu pa sigui flexibilisa, manera nos a bin ta haci un ultimo simannan, e grado di vacunacion bao di nos mes a yuda conduci na esey. Pero kier yega na e meta di mas hende vacuna localmente pa asina bo tin mas proteccion bao di nos mesun hendenan”, el a afirma.
Tambe el a sigura cu esey ta e meta na e momentonan aki y cu si Aruba sigui aumenta e cantidad di hende vacuna, por sigui mira mas flexibilisacion tambe.
Di mesun manera, Bon Dia Aruba tambe a tuma contacto cu Departamento di Salud Publico (DVG) pa haya sa ki tipo di maneho nan tin pa cu e busnan di diversion aki. Jurette Croes a menciona cu no, nan no tin maneho specifico pa cada sector, nan mes mester tin nan maneho.
Alabes, e mesun pregunta a wordo haci pa Cuerpo di Polis di Aruba pero Bon Dia Aruba no a haya un contesta specifico.
