Temporada di eleccion ta on, candidatonan ta bin haci campaña politico full rond di Aruba y cu esey te ainda e palabra “Integridad” ta keda resona den horea di comunidad na unda investigacionnan pa loke ta trata corupcion ta na ordo di dia.
Bon Dia Aruba a tuma contacto cu algun candidatonan politico di diferente partidonan, entre nan Gerlien Croes ken ta candidato number 4 riba lista di e partido AVP.
Pa cu esaki, Bon Dia a haci varios pregunta pa Croes den relacion cu e palabra “Integridad”, kico e ta pensa di Integridad y con importante ta pa su persona.
Ademas di esey mirando entregamento di lista cu a tuma luga algun dianan pasa, por a mira dos persona cu a postula nan mes aunke nan ta sospechoso penal na e momentonan aki y un di nan ta ex-minister Benny Sevinger, a wordo puntra pa Croes kico e ta pensa di esey.
Su compañero di partido Benny Sevinger ta wordo sospecha di comete e actonan penal aki: 1- valsheid in geschrifte, 2- oplichting, 3- aannemen van steekpenningen, 4- misbruik van funtie y 5- Opzettelijk /gewoonte witwassen, kico Croes ta su opinion riba esaki y pa finalisa a pidi un mensahe di integridad dirigi na e personanan cu kier sostene Croes den eleccion aki.
Pa tur e preguntanan aki, Bon Dia Aruba a haya un contesta hopi cortico y precies, “ta na su luga pa nos duna e espacio necesario na nos sistema hudicial haci su trabao, y sin ningun pre-huicio. Pa locual ta e pregunta specifico di e caso, mi no tin detaye y mi lo kier conseha pa acerca e persona (nan) en cuestion pa mas informacion”, Croes a expresa.
Pa finalisa, el a duna un mensahe na esunnan cu kier sostene Croes of lo tin pensa di duna su voto pe, “mi ta para pa un politica di contenido, respet y principio y mi ta spera cu comunidad duna sosten na esaki”, el a finalisa.
Ta importante pa destaca cu manera a wordo menciona caba, Bon Dia Aruba a haci e preguntanan aki pa otro candidatonan como Dr. Selene Kock cu tambe ta candidato riba lista di partido AVP, pero nos no a logra haya un contesta di dje.
