(EFE) – Polis Federal Brasileño ayera diaranson a cuminsa un operacion na varios ciudad di e pais pa determina e grado di participacion di e minister di Medio Ambiente, Ricardo Salles, y otro autoridadnan ambiental den un skema di exportacion ilegal di palo pa Europa y Merca.
“Ta wordo investiga e participacion di agentenan publico y empresario di e sector di palo den iregularidad den procesonan di exportacion di palo” Polis Federal a comunica riba e operacion Akuanduba, realisa na e capital Brasilia y na estadonan di Sao Paulo y Para.
E operacion cu a wordo batisa cu e nomber di un dios di indigena Araras, cu segun mitologia Amazonico tabata usa un fluit pa reestablece e orden ora un persona tabatin un mal comportacion, ta conta cu e participacion di 160 agente federal y ta cumpli 35 orden di entrada hudicial y prizon.
E accion a cuminsa door di un decision di e magistrado Alexandre di Moraes, di Corte Supremo, y a determina e “suspension inmediato” di dies funcionario publico di Ministerio di Medio Ambiente y Instituto Brasileño di Medio Ambiente (Ibama).
“Investigacionnan a wordo inicia na januari di e aña aki for di informacionnan haya hunto cu autoridadnan stranhero dunando noticianan riba posibel desviacion di conducta di funcionarionan publico Brasileño den e proceso di exportacion di palo”, e Polis a sigura.
Presidente di Ibama, Eduardo Bim, ta den e lista di e dies funcionario riba lo cual maximo corte di Husticia a pidi su separacion preventivo di su funcion den e ente regulador ambiental.
Orden di Supremo Tribunal Federal (STF) tambe a establece e suspension inmediato di un despacho di februari di e aña aki cu tabata flexibilisa e exportacion di palo y tabata permiti su envio sin e rekisitonan exigi pa ley.
