Cedes ya no ta djis un crèche. Despues di hopi aña ta fungi como un asina yama Gespecialiseerde Speelschool, Centro pa Educacion Special di Martha Echeverry awor ta reconoci como un scol basico acredita, cu ta enfoca riba particularmente hobennan cu mester di sigui scol pero no por draai sin mas den un scol regular. Den otro palabra, muchanan cu autismo por ehempel por acudi Cedes y nan mayornan por ta trankilo cu ta cumpli cu e ley di enseñansa obligatorio.
Inspeccion di Enseñansa a acredita Cedes como un scol pa muchanan di 3 pa 12 aña, despues cu e tin varios aña ta fungi como un crèche pa muchanan particularmente cu autismo y tambe cu syndroom di down. E scol tabata yuda mayornan cu tin yiu riba e lista pendiente pa haya scol na Dununman of Bibito Pin. “Pero, Cedes riba su mes ta un proposicion innovativo, den sentido den e forma con nos ta siña e muchanan.” E atencion na cada mucha ta hopi personalisa, ta inclui arte pa eleva e habilidadnan extracuricular cu ta yuda forma un mucha cu tin reto adicional. Asina ta traha riba e habilidadnan social, pero tambe riba conocemento di uso di computer y sistemanan automatisa pa nan por yuda nan mes mas tanto cu ta posibel. “Nos ta enfoca hopi mas riba kico realmente e mucha mester siña. Esey tabata e proyecto cu mi a presenta na Direccion di Onderwijs, cu tin hopi luna andando caba,” Echeverry a bisa.
Cedes pues awor a bira un alternativa den e forma di educa un mucha. Es mas, pa hopi hende, nan no tabata sa mes cu Cedes ta existi y ora cu a haya informacion di e scol, a tuma e oportunidad cu dos man, ya cu e ta keda un problema grandi pa muchanan cu retonan serio por haya un trayectoria educativo, te pa haya e preparacion pa crece y eventualmente bay traha.
Esnan cu tabata referi mayornan na Cedes ta entre otro logopedistanan, di Centro Multi Disciplinario y Psychiater di Mucha. “Nos a haya hopi bon recomendacion di e profesionalnan cu ta trahando cu e muchanan aki cu ta kere den nos programa.”
Scol priva chikito
Na e momentonan aki Cedes tin 14 mucha na e scol, cu ta parti den dos grupo, basa riba edad. Ademas di Martha mes, tin otro docente ta yuda cu e curriculum. Y un assistent hopi special ta Quincey Schilders “kende ta yama su mes e assistent di e assistent. Quincey ta un hoben importante pa nos.” Motibo pakico Quincey Schilders ta asina crucial pa Cedes ta cu e tabata un di e clientenan di Cedes. Un dama hoben cu autismo, Quincey a recore henter e sistema escolar di Aruba. A pesar di su inteligencia, Quincey no por a keda na scol regular, y finalmente a bay Emma School unda el a resalta, atrobe pa su personalidad y determinacion. Atardi Quincey tabata bay na Cedes pa e programanan di arte cu a yud’e den su desaroyo total. “Quincey ta un excelente trahado. E ta yuda e leidster di un di e gruponan y ta simplemente un excelente trahado.”
Inclusion cu derecho
Locual pa Martha Echeverry ta mas emocionante ta cu awor un ex alumno di su crèche, su centro, awor ta trahando cune y esey ta dun’e e motivacion pa busca mas persona cu autismo pa traha cune. “Mi kier ta coherente cu e discusion, cu berdad mester tin inclusion. Pero un persona cu autismo no mester traha semper como boluntario sino e mester por gana su cen. Mi ta pensando pa expande den e programa di arte y yoga cu un persona cu por tin autismo y toch tin e habilidad pa guia e gruponan aki.”
Locual a stroba Cedes cu e programa di arte y yoga na 2020 te cu awor ta e pandemia y tambe e situacion economico di hopi hende, pero e ta spera cu pronto Cedes lo por cuminza ofrece e programanan aki atrobe. “E lesnan ta basta economico, pero no tur hende por paga. Pero nos kier continua e proyecto, pasobra den e diferente exhibicionnan di arte a ripara con importante e ta pa un hoben Autista por expresa su mes. Esey ta e intencion pa sigui cu e programanan cu Cedes tin hopi aña ta ehecutando.”
Despues di scol basico, kico?
Mirando cu Cedes ta considera un scol pa muchanan te 12 aña, e continuacion di nan ta keda importante y den esaki a mira e posibilidad pa nan por sigui cu Muchila Creativo cu tambe awor ta acredita pa Inspeccion di Enseñansa pa brinda educacion alternativo.
“Nos a sinta cu Sra. Provance di Muchila Creativo pa e muchanan cu caba cu Cedes por sigui nan educacion cerca dje. Cedes como tal mester enfoca pa prepara e muchanan pa continuacion di enseñansa, for di e aspecto cognitivo, creativo te academico. “Mi ta spera cu e muchanan cu caba Cedes ta mas independiente posibel. Y awor mi tin un grupo di mayor hopi uni y fuerte den sentido, unda nan ta sinti cu nan ta parti di e ekipo. E ta importante cu mayornan ta envolvi pa asina nan yiunan por logra.”
No ta cuestion di laga scol so ta e instancia pa educa un mucha cu reto adicional. Pasobra pa particularmente muchanan cu autismo, regularidad y rutina ta esencial y mayornan mester percura pa esaki. “Pero nos a mira con nos mayornan ta hopi consciente. Nos tin un grupo di whatsapp unda tin hopi combersacion ta tuma luga. Esey ta mi meta, esta cu nos ta un centro unda mayornan por busca ayudo.” Y Cedes ta brinda ayudo te unda cu por of ta referi na otro profesional of instancia cu por yuda nan. “E problema cu mi a ripara aki na Aruba ta cu e clientenan ta bira hopi selectivo, nan no kier comparti informacion. Un persona Autista no ta exclusivo di ningun instancia. Mester por comparti informacion pa beneficia e grupo aki. “Ta un ser humano cu mester di hopi ayudo.”
Nan kier ta independiente
Hopi persona cu autismo cu awendia ta papia pa nan mes a logra esaki danki na esfuerso grandi di esnan cu a dedica na nan. E por ta un scol, un instancia y mayornan hunto cu nan famia cu hopi biaha ta pasa den duro pa percura cu e mucha cu autismo por desaroya den un adulto sigur di su mes y cu habilidadnan pa ta independiente. E ehempel di Quincey Schilders ta bibo cerca Martha Echeverry, pasobra e ta corda e trabou duro di tur envolvi pa a sigura cu e hoben por a bay dilanti. “Awor nan ta hende cu por papia y defende nan mes, pero nos a pasa momento dificil.”
Autismo no ta semper ta un bunita storia
Martha Echeverry ta enfatisa cu hopi biaha ta tende di storianan bunita di personanan cu autismo cu ta logra. Pero e storia di autismo mes no semper ta bunita. E famianan y e mucha cu autismo mes ta esunnan cu ta biba cu e trauma y e drama cu mayoria biaha ta keda scondi pa resto di comunidad.
Martha Echeverry a bisa cu ainda Cedes no ta haya subsidio di Gobierno, manera scol regular, pero cu a haci e peticion si pa e mayornan cu mester di sosten por haya un parti di e gasto pa e scol priva aki cubri. E peticion a bay aden na momento cu Gobierno a cay pues pa awor, lo no por conta riba esaki. “Tin e posibilidad si cu e subsidio kizas lo no ta bay cubri henter e gasto mensual, pero si por yuda algun mayor cu e peso financiero,” Echeverry a bisa Bon Dia Aruba.
Ademas di lesnan, Cedes ta facilita su espacio pa Micky Foundation, unda muchanan cu mester terapia por haya esakinan den e patio di Cedes.
