Den un conferencia di prensa semanal, partido RED Democratico a presenta dos di su candidatonan nobo riba lista cu cual ta participa den elección parlamentario di dia 25 di juni awo.
E prome candidata no ta un persona desconoci na Aruba. El a traha hopi aña riba tereno social, esta Brigitte Zijlstra. Hopi aña el a traha cu detenidonan na Korrektie Instituut Aruba (KIA, cual di biaha a bisa no ta cuadra cu su nomber.
El a splica cu el a uni su mes na e partido RED Demoratico, cu ta un partido cu ta para pa derechonan humano y ta lucha contra loke no ta canando bon. E ta preocupa masha hopi pa derecho di e hobennan cu ta cay den man di husticia, debi na motibonan social.
E di dos candidato nobo ta Francisco Mejia, gradua den Bouwkunde. Aunke el a nace na Sto Domingo, el a lanta henter su bida den Rancho y Madiki. Mejia ta un persona cu a bay studia na Hulanda, sin beca pero cu apoyo financiero di diferenta familiar, el a logra caba su estudio den cuatro aña, mustrando hopi perseverancia di su banda. Na final el a traha algun trabou y haci algun estudio extra prome cu el a bolbe Aruba. Awe tin su mesun negoshi.
E tin mas cu 25 aña trahando den mundo di construccion y durante tur e tempo aki, el a sigui educa su mes pa keda al tanto di e mundo aki. E ta cas, tin un famia y ta gusta deporte.
Mejia a splica cu pa hopi aña caba e ta sigui politica regional y tambe esun local. E conoce lider di RED for di tempo e tabata chikito y awo a dicidi di dal e paso pa drenta politica y traha pa vision y ideal di RED unda Integridad y Transparencia ta hunga un rol importante. E ta admira e programa economico / social, di cual infrastructura ta hunga un rol importante. “Mi ta dispuesto pa duna di mi parti pa engrandece esaki. Mi ta apela na tur hende pa vota. Hacie cu consenshi y consciente.”
RED tin e vision cla pa maneha, el a bisa na final.
