(ElNacional) – Jorge Makriniotis, gerente general di e diario El Nacional, embarga diabierna pasa cu apoyo di cuerponan arma, riba orden di Tribunal Supremo diHusticia (TSJ) di regimen di Maduro, a bisa EFE cu e propietarionan di e medio “lo bay recupera” e edificio tardi o tempran, “pasobra husticia lo yega”.
Makriniotis a referi asina na e demanda di mas di 13 miyon dollar pa Chavista di promer rango Diosdado Cabello, cu a demanda e corant pa reproduci un publicacion di e diario ABC di Spaña, tocante un investigacion cu ta vincula e politico Chavista cu narcotrafico.
“Di ey ta bin e promer demanda di Cabello pa difamacion, cu no ta difamacion pasobra e no ta un opinion personal, sino un noticia,” Makriniotis a bisa, cu a agrega cu e asunto di El Nacional ta un strategia politico, cu algun persona dentro di gobierno ta usando pa nan keda inclui den algun negociacion. Segun su opinion di e dirigente, e operacion hiba contra e corant ta un tipo di ‘moneda di cambio’ den e negociacion cu ta bay tuma lugar entre oposicion y gobierno di Maduro.
Makriniotis ta considera cu, mientras El Nacional ta den man di e regimen nan por ofrece debolbe e instalacion na e propietarionan a cambio di algo cu lo nan solicita di oposicion y pa cual Juan Guaido lo mester cede pa cambia e situacion actual.
Ta keda, banda di e posible uso di e propiedad pa negocia, e obhetivo importante pa e regimen di trata na silencia un di e principal medionan independiente na e pais, cu tin ademas trayectoria y aprecio den comunidad.
