Un ministerio so… Tabatin spiritu…?

Un punto cu ta bin dilanti den e Agenda di Implementacion (Uitvoeringsagenda) acorda entre gobierno di Aruba y di Hulanda ta e preocupacion con pa mehora operacion di e aparato publico, inclusive e entidadnan semi-estatal. Pa logra esaki tin varios trayecto di analisis y investigacion andando, unda segun nos ta tende di ambos banda, tin un colaboracion continuo pa yega na e base di informacion necesario pa mas den aña tuma e medidanan corespondiente pa mehoracion.

E proceso aki lo mester haci e aparato mas efectivo, cu menos gasto y mas capacidad operativo. Esaki incluyendo e staffnan di e ministronan, segun e texto di e Agenda di Implementacion. Es decir, nan no ta impresiona cu e “slagkracht van de ministeriële staven” y ta kere cu aki tambe tin cos di drecha. E observacion aki den e texto di e Agenda no ta sorprende nos; poco biaha nos a keda impresiona cu e efectividad di e teamnan rond di e ministronan, cu ta bastante den cantidad pero hopi menos den calidad. No cu nan no tin experto, pero di mayoria di e colaboradornan cu e ministronan actual tin, poco di nan ta cay den e categoria di ‘asesor’ y mayoria ta di e categoria di loke den deporte di ciclismo ta considera ‘waterdragers’ (cu ta busca awa patras pa e lidernan dilanti). Den cierto caso e comparacion aki hasta tabata literalmente berdad, po ehemplo ora un ministro mester a bay ‘den field’ pa cumpli cu compromiso. Naturalmente nos ta bay tende cierto defensa na fabor di e actual gabinete, cu a reduci e cantidad di colaborador cu un ministro na cierto cantidad, 25 persona si nos no ta kiboca. Esey ta mustra positivo compara cu e anterior gabinete, unda tabatin hopi mas y e promer ministro mes tabatin mas di 130 persona riba su payroll. Mester bisa cu entre e grupo grandi ey tabatin departamento completo cu no tabatin un structura legalmente formalisa, otro indicacion cu ‘djis haci algo y no worry cu requisito legal’ e tempo ey tabata parce parti di e cultura interno.

E limitacion menciona di e cantidad di empleado na e despacho no a haya un clarificacion si e asina yama ‘spiritunan’ cu no tabata aparece na trabao pero tabata cobra si, tabata inclui den e conteo ey. Ademas, fuera di e ‘spiritunan’ na ministerio di Infrastructura cu a haya cobertura nacional a traves di e ministro manda cas pa parlamento, nunca nos a haya un update cuanto spiritu lo tabatin na e otro ministerionan. Ta dificil pa nos kere cu e practica di spiritu aki tabata existi na un solo ministerio, ya cu a traves di mas di 30 aña nos por a mira cu mal custumber mas tanto ta algo general cu bo ta topa tur caminda, un mas cu otro, esey si.

Pero pa nos por evalua en concreto si 25 persona den e alrededor di un ministro ta hopi of poco, nos mester papia promer di pakico nan t’ey y kico nan ta haci. En corto bisa, durante añanan 90 di siglo pasa a bin e transformacion grandi di ministronan cu un staff reduci di algun persona, te na e gruponan grandi cu nos por admira awendia. Esey tabatin como argumento hopi biaha cu e departamentonan cu mester a suministra cierto servicio di asesoria no tabata move cu tanto velocidad, den cierto caso pasobra nan no tabata por mihor, pero den otro falta di voluntad a base di preferencia politico tambe tabata den wega. E problema den practica ta, cu mientras e proceso di analisis y toma di decision a move pa e despachonan di ministro, e departamentonan a keda margina y menos ainda capaz pa duna un apoyo adecuado. Di otro banda, na e despachonan ministerial no a arma equipo di puro asesor di nivel cu merece e nomber ey, sino cu el a bira un asunto di puro patronahe politico pa duna hende ‘di confianza’ trabao. Cu esaki, e argumento original, di sobrepasa cierto incapacidad di e departametonan, a keda descarta pasobra e no ta relevante mas.

Resultado ta cu nos como ciudadano ta contribui cu nos placa pa mantene dos sistema di asesoria pa cada ministro, y ningun di dos ta satisface y ta entrega loke gobierno realmente mester.

Esey pa e partidonan den gobierno tampoco ta un problema, pasobra tin ‘family & friends’ cu no mester di trabao na e despacho. Nan ta e categoria di asesor cu tin nan mes empresa y cu no ta aparece riba payroll di gobierno, pero ta cobra directamente a base di contrato, esey nos ta spera anto, cu e caso Refineria di Aruba en mente, como suministrador di servicio na gobierno. Nan ta yena e ‘blank spots’ cu e dos nivelnan di asesoria, obviamente incapaz, ta laga pa e ‘berdadero expertonan’ aki bin aden. Loke nan ta costa nos ta dificil pa calcula, pasobra nan ta cay den e categoria “Goederen & Diensten” hunto cu un monton di otro asunto.

Nos ta contento di lesa den e Uitvoeringsagenda cu ta bay pone e asunto aki bao di lupa y bin cu mehoracion cu ademas por bay costa nos menos. Na esnan cu ainda ta murmura den banda cu e Hulandesnan mester keda leu y laga nos drecha nos mes asuntonan (‘nos mes por’), nos tin un par di pregunta cortico: Con? Ki dia?