Affinor Growers (RSSFF) di Canada a caba di firma un letter of intent pero cu ta mara ambos partido, pa cumpra 100 porciento di accionnan di Vertical Designs Aruba. VDA ta un corporacion cu a keda forma na 2018 pa produci fruta, berdura y cannabis pa exportacion. Cu compra di VDA, e accionnan di Affinors Growers a subi 0.30 porciento di balor.

Affinor ta financia e acuerdo cu 52 miyon di accion comun di su portofolio, cu ta bal 0.03 dollar, cu despues lo keda transferi pa VDA, na momento cu logra algun obhetivo clave. E parti mas importante ta e emision di un permiso di exportacion di produccion di cannabis for di Gobierno di Aruba. Tambe, e acuerdo ta bisa cu 49 porciento di e proyecto mester ta bendi na un prijs minimo specifica cu mester keda aproba pa Directiva di Affinor.

Segun relato di Affinor, e plan ta pa produci cuminda y cannabis na forma sostenibel, y e idea ta pa logra esaki na un area enorme na parti Noord di e isla. Ta papia aki di 100 acres, cu ta igual na mas di 400.4 mil meter cuadra di tereno. E tereno mester por acapara 1000 toren vertical pa cada 4000 meter cuadra. E produccion di fruta y berdura lo baha e necesidad pa importa cuminda, crea trabou cu salarionan halto, educacion, conocemento tecnologico y entrada cu ta produci impuesto.

Pendiente e permiso pa cannabis, e acuerdo ta rekeri pa Affinor transferi 26 miyon di su accionnan comun den e compania, na e accionistanan di VDA, como tambe e bonus di 10 porciento riba e prijs di benta minimo, mas 500 mil dollar Canades.

Banda di e permiso pa cannabis, e otro obhetivo clave ta e construccion di un facilidad di 200 toren, y logra un minimo di 5000 a 6000 liber di cannabis pa exportacion. Unabez cu esaki sosode, e balance di e 26 miyon accion comun di Affinor lo pasa pa e ex accionistanan di VDA.

Affinor ta uza tecnologia di agrario patenta y ta depende di energia alternativo di Tesla, tecnologia di mest y luz LED. Affinor ta usa e asina yama Tesla Powerwalls y panelnan sola den su ‘greenhouse.’

“Mision di Affinor ta pa yuda mundo cu tecnologia sostenibel di agricultura sin compromete na calidad. Mi ta hopi emociona cu e proyecto aki,” Nick Brusatore, CEO di Affinor a declara. “Aruba ta un pais caluroso, bunita yen di hende fantastico. Mi ta orguyoso di ta parti di e movecion global pa sostenibilidad y paisnan cu kier ta auto suficiente, manera Aruba.”

VDA ta un VBA cu a lanta dia 12 di September 2018 y tin como Director Robert Andreas Beukenboom, naci na Aruba y Ronald Adolf, naci na Canada.

Ganashi di 2 miyon dollar

Si e benta sigui, e ta nifica cu e compania VDA ta haya un pago di 1.5 miyon dollar, mas e bonus di 10 porciento, cu ta un minimo di 500 mil dollar Canades. E ta nifica cu VDA, cu no a produci fruta ni berdura y sigur no cannabis, apesar di a haya e tereno, ta bay haci un ganashi di 2 miyon dollar Canades.

Affinor ya tabata envolvi cu VDA na 2018

Na 2018, ora cu VDA a lanta, a sali un relato di prensa na Canada cu ta bisa cu e subsidiario di Vertical Designs a haya e licencia exclusivo pa usa e tecnologia di Affinor, cu awor a cumpra VDA. VDA a inclui Dennis Marsden como miembro di directiva, y sr. Marsden ta originalmente di Vertical Designs, y na 2018 tabata un ehecutivo elehi na Coquitlam, British Columbia (Canada). Vertical Designs ta un compania priva cu tabatin intencion pa subi mercado publico di Canada cu e Bullion Gold Corp. E compania ta responsabel pa tur e diseño y patentenan pa Affinor Growers, cu un biaha mas, ta bay cumpra Vertical Design Aruba. Affinor di su banda ya caba tabata un compania publico riba e Canadian Securities Exchange y ta enfoca riba produccion di lechuga, spinazie, strawberry haciendo uso di e tecnica di vertical farming.

No tin mucho dato publica di VDA

Bon Dia Aruba a purba haya mas informacion di e actividadnan di Vertical Designs Aruba desde cu el a keda funda. No tin un website specifico y tampoco pagina di FB. A manda pregunta na vocero di Minister encarga cu Sector Primario Cris Romero, pero no a haya ningun contesta. Motibo ta cu manera e relato di Affinor ta bisa, aki ta trata di un tereno di mas di 400 mil meter cuadra y ya esey ta cay bou un maneho di tereno comercial. Normalmente tereno pa cunukeronan local ta mas chikito y esakinan ta huurgrond. Tur proyecto grandi ta bay directamente pa DIP, a informa Bon Dia Aruba.

Como tal, Bon Dia Aruba a tuma contacto cu DIP y a haci varios pregunta. Entre otro, unda specifico VDA a haya tereno, y si esaki tabata tereno comercial of huur, y si ya caba a inverti riba e tereno. Ademas, a haci e pregunta con por duna tereno publico na un compania pa produci cannabis, si te ainda e ley no a pasa. Director di DIP Haime Croes a bisa di lo contesta e preguntanan aki despues.

Maneho di tereno publico ta cay bou Constitucion

Mientrastanto Constitucion di Aruba ta bisa cu ta regla tur tereno publico pa ley. E articulo aki, V.21 tin su motibo. Den e splicacion ta bisa cu a hinca e articulo aki den Constitucion pa motibo cu maneho efectivo di tereno publico y derechonan publico ta di tal balor cu ta Parlamento mester bin cu e areglonan. E termino ta referi na tereno y edificionan, pero tambe mineralnan bou superficie como tambe bou lama. Tambe mester ta asina cu ta duna permiso pa saca material for di superficie y cu esaki mester sosode na un forma responsabel. E ley riba tereno publico, esta e landsverordening uitgifte eigendommen Aruba ta bisa cu e Minister encarga ta autorisa pa huur, of alcila of duna e tereno publico na otro pa mas di cinco aña pero cu e mester sosode pa medio di inscripcion habri. Den caso cu ta dicidi pa no sigui e paso di inscripcion habri, e otorgamento di tereno publico pa duracion largo (mas di cinco aña) mester sosode pa medio di un decreto, esta un landsbesluit.