Den un conferencia di prensa cu prome minister demisionario, Evelyn Wever-Croes a tene ayera, el a comenta riba e desaroyonan mas recien di e pandemia di Covid-19 na Aruba, sigurando cu e situacion ta ‘bao control’.
“Mi kier a para un rato keto na e situacion di Covid”, el a bisa. “Nos tine hopi bon bao control, e ta bayendo den e bon direccion. Nos no ta fo’i peliger si ainda, pero nos tine miho controla aworaki.”
El a destaca algun cifra pa confirma esaki. “For di ayera nos tabatin 88 caso activo, el a baha considerablemente. Esey ta un cifra cu nos ta sinti nos bastante confortabel cune, nos weitando cu cada dia si tin mas caso nobo ta bin, pero mirando tambe cu hendenan ta recuperando.”
Sinembargo, el a destaca un tendencia di cual a tuma nota. “Nos a nota si un tendencia den ultimo dianan, cu e [cantidad di] persona cu ta wordo admiti den hospital ta aumentando. Di un banda esey ta un bon señal, pasobra te cu poco tempo pasa, nos tabata mira cu hendenan tabata tarda pa yega hospital pa haya asistencia.” El a expresa con hende tabata warda te ora cu nan no por a hala rosea mas pa busca ayudo medico, pero cu awo ta nota cu hende ta yega ‘mas trempan’, es decir, prome cu e sintomanan bira asina severo. Door di esaki, ‘por yuda cada un di nan miho’, Wever-Croes a comenta.
Ademas, Wever-Croes a destaca cu ta mas di cinco mil persona caba a ricibi e prome dosis di e vacuna contra SARS-CoV-2, e virus cu ta causa e malesa di Covid-19. “Esaki ta pone nos na 58 porciento” di poblacion vacuna. “No ta bayendo mesun lihe cu na principio, pero e ta un porcentahe cu ta hopi bunita pa mira na e momentonan aki.”
“Mas importante”, segun Wever-Croes, ta 60+, “dus esnan riba 60 aña [di edad], cu 67 porciento di nos poblacion tin por lo menos un dosis caba, y esey ta e grupo cu nos kier protege mas.”
Sinembargo, Wever-Croes a resalta cu maske e cifranan di vacunacion ta alentador, nan ta leu ainda di e meta di inmunisacion pa Aruba, cu ta pa 85 porciento di e poblacion total di e isla ta completamente vacuna (cu tur dos dosis). “Pa esey nos ta trahando riba algun otro opcionnan pa trece e vacunacion mas cerca di hende, en bes cu tur hende mester bay na centro di vacunacion.”
Mirando cu e situacion di Covid ta bao control, Wever-Croes a declara cu Crisis Team a relaha algun di e medidanan relaciona cu e pandemia, maske lo sigui monitor esaki ‘cada dia y cada tres dia reevalua cua ta e pasonan cu mester wordo tuma’. “Si cifranan sigui baha, si nos por continua di domina e situacion di hospital, y nos cifra di vacunacion aumenta, e ora nos por sigui flexibilisa”, Wever-Croes a afirma. “Si cifranan di Covid subi, of e situacion na hospital ta bay bao presion, of nos no ta logrando nos meta di vacunacion, e ora lamentablemente nos tin cu bolbe bin cu medidanan.”
Wever-Croes a finalisa cu un apelacion ‘pa tur hende’ pa sigui cuida nos mes y cuida nos famia. “Gobierno ta hala atras aworaki pa cuida abo y cuida bo famia. Awo e ta den bo man pa cuida bo mes, cuida bo famia, pa asina nos yuda Aruba bay p’adilanti.”
