Erasmus +, proyecto pa innovacion di scol y pa maestronan crece den area profesional

Den un sesion informativo di Sindicato di Maestronan (Simar) na unda cabesantenan di Pius X scol juffrouw Sheila Tromp , Nadine Kirindongo di St Franciscus College y di St Dominicus College Caroline Cardoza tabata presente nan a motiva otro scolnan pa nan tambe por participa den loke ta trata e proyecto Erasmus + na Aruba.

Sheila Tromp a expresa cu Pius X scol a cuminsa cu Erasmus + na unda nan a haya sa di un proyecto cu tabata existi cu por facilita scolnan riba programanan innovativo y cu tin un presupuesto grandi pa cu esaki, for di eynan e idea a cuminsa pa sondea kico tabata encera Erasmus + y asina nan por bay cune pa mas scolnan.

A wordo acerca pa diferente scol segun loke Tromp a sigura y nan a haya cooperacion hunto cu St Franciscus College y St Dominicus College cu tabata dispuesto pa drenta y cuminsa e proyecto nobo aki.

Tromp a sigura cu e prome reto cu nan a haya tabata cu nan a mester skirbi un proyecto pero na e momento ey nan no tabatin e conocemento ni espacio pa nan como cabesantenan mes pa haci’e y carga cu esaki manera el a declara.

“Mientras nos tabata busca informacion, nos a ripara con grandi esaki ta, pero e meta cu nos tabatin ta pa logra algo nobo pa nos scol”, el a bisa.

Ta p’esey cu nan a haci uso di e oportunidad aki y aña pasa na luna di mei nan a haya e noticia cu nan proyecto a wordo aproba, e proyecto di nan tabata encera tocante formacion pa e docentenan, busca oportunidad pa nan por bay na un pais y wak den otro proyectonan con nan por implementa esey akinan na Aruba. “E parti importante na e momento ey tabata pa habri e mundo di enseñansa y di e docente tambe”.

E sistema pa haya sa cuanto puntuacion scol ta haya segun loke Tromp a indica ta completamente digital, na unda nan tin cu cumpli cu diferente criterio entre nan un identificacion di scol, documentonan cu ta prueba cu scol ta existi y si directiva ta di acuerdo cu esey, “importante di Erasmus + ta pa nan maneho y nan ideanan biba na e diferente paisnan”, el a bisa.

Asina mes, el a informa cu nan ta conta cu Hulanda loke ta haci cu nan por bishita Hulanda y e ora ey e portanan ta habri pa otro paisnan den Europa, el a destaca cu loke tambe ta importante ta cu nan kier wak cu loke nan ta haci ta bay bek na unda bo ta.

“Loke bo kier haci tambe mester ta bon defini, mester tin motivacion y un programa extenso tambe”, Tromp a destaca.

Manera el a menciona caba, mester cumpli cu diferente criterio na unda e sistema mes ta evalua e peticion y ta bisa cuanto porcentahe scolnan ta haya of si nan no ta cumpli cu e maneho rekeri.

Tromp a sigura cu nan tin un plan pa expande kico ta Erasmus + na Aruba y cu nan a haci esey cu e cabesantenan di scolnan primario y secundario na unda nan mester purba pa e programa tur loke nan kier haci cu e proyecto aki.

Nadine Kirindongo a comenta cu loke ta trata combina e oranan di trabou na scol cu e oranan dedica na e proyecto, nan a trece dilanti cu e reunionnan nan tin cu hacie despues di oranan di trabou pa motibo cu como cabesante nan tin hopi tarea pa haci y nan tin un persona cu ta esun cu ta carga e proyecto pa asina haya mas apoyo.

Nan ta hopi gradici pa e oportunidad como scolnan di Playa, Madiki y Dakota na unda e ekipo di scolnan segun nan mes a sigura ta hopi dinamico y nan ta constantemente den crecemento, vooral cu e proyecto Erasmus + na unda ta papia riba loke ta crecemento personal como maestro.

Nan tres scol ta haci e proyecto hunto segun loke Kirindongo a manifesta pero tambe nan a motiva otro scolnan cu no tabatin e oportunidad pa participa den esaki y cu e ultimo dia pa nan por entrega nan peticion ta mañan dia 18 di mei.

Nan ta e prome consorcio di scolnan primario cu a cuminsa cu e proyecto aki segun nan a sigura y despues di esaki no tabatin e oportunidad mas pa haci consorcio, loke ta nifica cu awor cada scol mester haci esaki di manera individual, nan prome peticion cu nan a hay’e pa dos aña ta culmina na aña 2022 y awor pa via di pandemia nan ta haya e chens pa por alag’e pa un aña mas pa motibo cu nan no por a biaha pa por bishita e luganan.

Aworaki scolnan ta haya dos oportunidad pa por haci un peticion individual, un peticion cu ta dura un aña y mey cu por ta un proyecto chikito, e tres scolnan aki a haci un otro peticion na unda na september di e aña aki nan ta haya sa si nan lo logra atrobe e oportunidad pa haci un proyecto di un otro topico.

E plan ta pa october di e aña aki un grupo lo sali pa Spaña, den e peticion nan pa pidi pa 20 persona biaha, 6 persona so ta bay di cada scol, ora e maestro bay e como scol tin cu zorg pa otro hende sigui duna les na e muchanan pa motibo cu nan no mag di perde les, ademas di dos persona di Skoa cu tambe ta bay.

Nan tambe a menciona cu e personanan cu ta encarga cu Erasmus + a bin Aruba, nan a sinta cu scolnan na unda nan splica kico ta nan plan y nan a haya ideanan caba di con nan ta bayendo, nan tambe ta duna informacion na diferente departamentonan di scol pa asina yuda y purba di pusha mas scol, mas instancianan, mas organisacion pa haci uso di e oportunidad aki.

E topico cu nan a trece dilanti ta trata di digitalisacion den era 21 y con esey ta otro paisnan, e programa aki ta zorg pa conocemento y no pa devices como por ehemplo, pa traha riba e docente y haci di dje un persona habil cu tur sorto di conocemento pa wak con e ta bin bek y ta aplica esey.

Den esaki tambe tin e parti di inclusion na unda tin biaha cu muchanan den bario cu no ta haya e posibilidad pa biaha, asina un scol ta ofrece e oportunidad pa e mucha ey por biaha y conoce e mundo afo, e idea di Erasmus + mester permanece den scolnan.