12 partido den contienda… Y tur mester duna claridad…

Entrega di lista a termina, y tur partido cu a postula candidatura por participa. Esey no ta ningun sorpresa pasobra ta conoci cu otro partidonan, especialmente e grandinan, ta haci un yamado riba persona di nan base pa bay firma pa esunnan cu ta den problema ainda. Esey no ta solamente un gesto deportivo, sino tambe loke na Hulandes nan ta yama ‘welbegrepen eigenbelang’. Mas partido (chikito) participa, mas grandi e competencia entre e chikitonan lo ta bay ta. Esnan cu no ta bay vota pa un di e partidonan grandi tin amplio escogencia. Lo ta bira un trabao di otro mundo caba pa lesa programa di nan tur. Pa nos den prensa esey no ta un problema, sino simplemente trabao. Pa otro ciudadano sin embargo lo bira dificil memoriza ta ken ta pro esaki o contra esaya. Di cada partido loke ta keda colga den mente di hende ta un par di e frasenan clave cu nan lo expresa, nada mas. Pesey tambe cu ta asina importante pa scoge cu cautela loke ta bay trece dilanti como lema central den campaña.

Mientras tanto, ta parce bastante logico cu e partidonan grandi no ta bay perde demasiado tempo cu ataca e chikitonan, pasobra asina nan mes lo ta pone atencion publico riba nan. Otro asunto ta e contrincante grandi di semper, unda lo bay saca atrobe e picanan mas grandi cu e rival a yega di comete y por anticipa cu ta bay den pasado te na inicio di historia politico mes. Si nos a spera un campaña diferente di principalmente e dos partidonan cu semper tin recurso mas amplio pa campaña, anto loke nos a mira te awor lo mester ta kitando tur e speranza cu un persona por tin, pasobra e enfasis riba bandera y sticker y boroto cu musica superfuerte y, importante, hopi hende aglomera durante oranan largo, ta bisa cu pa nan nada a cambia. Y e pregunta ta surgi atrobe si nos lo por mira un cambio den mentalidad, di pueblo y di e partidonan, unda ta enfoca mas riba kico e partidonan tin di conta y menos riba e bandera cu pa varios luna ta parce di ta reemplaza esun di Aruba. Nos ta tempran den e proceso ainda y nos no a mira tanto ainda, pasobra nan ta trahando riba nan programa. Algo di comprende pasobra e campaña a gara hopi di sorpresa.

Sin embargo, nos ta nota cierto cautela ora ta papia di loke lo mester bay sucede despues di eleccion, y esey no por keda asina. Ta indispensable cu den e debatenan cu ta bay tin haci un intento pa haya claridad riba e punto aki. Al fin y al cabo, e gobierno nobo, cualkier cu e ta, ta aki dos luna. E partidonan por wel di laga por ehemplo presupuesto pa despues di campaña y eleccion, placa lo tin en todo caso proporcionalmente, pero goberna den segundo parti di e aña aki lo ta un desafio, pasobra tempo pa tuma medida lo ta hopi cortico. Den cierto sentido aki e partido grandi demisionario tin un bentaha, ya cu nan ta defende e maneho hiba te awor, y specialmente e acuerdo cu Hulanda. Otronan por murmura, evadi pregunta tocante e tema, pero esey no ta haci cu e asunto ta central riba mesa. Tambe ta un bentaha pa e partido gobernante cu a pesar di e situacion economico dificil, no tin disturbio y inquietud social, pasobra en todo caso e necesidadnan basico ta cubri. Y esey no ta algo asina simple, pasobra e grupo cu a keda desampara ta bastante grandi y mester a percura pa nan haya lo minimo cu nan mester. E siguiente fase lo ta con pa yega na mas empleo, y aki mester bisa cu ta un manera so tin y esey ta recuperacion di turismo. Por observa cu ya tin mas actividad den e sector aki y si control di e virus logra, por spera cu economia por cuminza bin riba pia den di dos parti di aña.

Di otro banda, e desafionan pa gobierno, cualkier cu bira, ta keda practicamente mes grandi. Ta necesario pa percura pa sumanan grandi pa cera presupuesto, cu lo ta un peso grandi, mientras e mehoracion economico leve no ta trece entrada grandi pa gobierno ainda. Ta ironico anto pa tende den e dianan aki un represetante di e partido grandi den oposicion bisa den entrevista na un radioemisora cu gobierno (demisionario) tabata mucho pura pa firma cu Hulanda y talvez a bay fia mas cu tabata mester… Nos mester ta contento cu e observacion aki, pasobra e por ta un señal cu porfin den e partido ey, despues cu den tres aña nan a desperdicia mas di 1.200 miyon (entre 2012 y 2014), nan ta comprende cu mester anda cu cuidao cu placa di pueblo…? Di tur manera, si nan kier recobra confianza di e pueblo votador, nan mester duna muestra di un cambio di mentalidad den esey, y tambe pa loke ta e normanan den nan organisacion pa ‘loke ta di mi y loke NO ta di mi’. Cu tanto (ex)ministro den problema cu husticia ta dificil pa keda ignora cu algo no ta andando corecto internamente. Tempo lo bisa si ta haci esey y ta na e otronan pa exigi e cambio moral necesario.