Alcoholismo ta un malesa di adiccion cu hopi biaha ta bin for di otro trastorno, como depresion. E trastorno depresivo ta un sindroma di estado di animo cu ta afecta estado emocional, cognitivo, motivacional y psicomotor di e persona cu ta influi den su relacion cu loke ta rond di dje.

Un habito no saludabel, como consumo di alcohol, por ta un factor cu ta ocasiona depresion. Otro biaha, ta e abuso di su uso e consecuencia di un trastorno depresivo cu a evoluciona na medida cu tempo ta pasa.

Ora e depresion ta bin prome cu e alcoholismo, e persona ta busca den alcohol un alivio di e sintomanan depresivo, e ta un relahante cu ta permiti pa e persona desconecta temporalmente di sensacionnan y pensamentonan negativo, cu e persona depresivo ta mantene activo henter dia.

E problema di alcohol ta cu ta un opresor potente, ademas ta altera e medicina anti depresivo, pa loke e depresion por bira pio hopi lihe.

Na Aruba manera a keda conoci den ultimo añanan, ta hopi hende ta sufri di depresion na e momentonan aki, ta hopi hende mester di un ayudo lihe pa cu esaki no lo bira pio aunke Fundacion Respaldo a plantia esey algun simannan atras.

Lamentablemente pa via di depresion, tambe tin hende cu a dicidi di kita nan mesun bida y por a mira cu esey a tuma luga algun dianan pasa loke a causa un shock emocional na e comunidad y pa cu esaki, Bon Dia Aruba a busca e opinion di un psicologo na unda Dimitri Halley a splica con esaki ta afecta comunidad no solamente di Aruba cu ta considera un One Happy Island sino na henter mundo.

El a sigura cu mester duna educacion real psicologico na e comunidad, con e hende ta bay deal cu nan sentimentonan y no sconde of tapa nan, con ta bay deal cu stress y cu nan mesun traumanan cu no ta suficiente pa e personanan aki haya un droga psikiatrico, “hasta e tratamento psicologico cu nos ta importa di Hulanda cu nos ta yemel’e cognitivo comportacional no ta suficiente, esey tambe ta tapa”.

Halley a menciona cu mester utilisa e proceso cu ta yama ‘psicologia di e sombra’ profundo ora un persona ta haya un chens pa saco afo tur su sentimentonan y traumanan cu el a biba, eynan tin un tecnica di con nan ta procesa e sentimentonan y traumanan sin tapa nan, “esaki ta importantisimo y loke a pasa algun dianan pasa ta pa nos conscientisa e pueblo y instancianan”, Halley a bisa.

Treciendo dilanti algun tipo di trauma, ta importante pa papia di abuso sexual specialmente na e momento cu e persona tabata un mucha y cu ta carga cu e trauma ey pa henter su bida loke por causa adiccion na cierto substancianan como por ehemplo, alcohol.

Di mesun manera tambe tin casonan di personanan cu a carece di un mama of un tata, tur esaki segun Halley ta bay pone cu e persona hamas y nunca e no ta bay logra un relacion fructifero personal, e traumanan lo wordo ripiti den e presente.

“Mescos cu alcohol, tur droga ta manera un refugio y tambe ta sirbi pa e pashent bay ‘freeze” Halley a menciona.

Un indicacion cu e comunidad ta adicto na remedinan ta loke a tuma luga algun simannan atras pa loke tin di haber cu e lista di remedinan na unda por a ripara cu e hende ta asina adicto na nan cu AZV y Gobierno a haya cuestionamento riba esaki cu na final nan a dicidi pone nan back.

“Esaki ta un indicacion cu e pueblo ta adicto na e tipo di remedinan aki cu tur tin di haber cu bo emocionnan, pa loke e pueblo a bira adicto na e refugio robes”, Halley a declara.

Ta p’esey cu dokter ta indica cu ora un persona ta biba cu un persona depresivo busca ayudo pa e lo haya un terapia y asina bay back na su pasado, aunke Aruba tin un problema grandi na e momentonan aki pa loke ta trata salud mental, ora un persona ta busca ayudo ta bira dificil pa haya un afspraak lihe y esey por causa cu e persona ta bay core.

“Como instancia mes y bo responsabilidad lo cual bo ta brindando no ta yudando, pasobra mester tin un respuesta di kico ta pasando”, pa e motibo aki el a expresa cu mester cambia e manera di duna cuido na Aruba.

Uso di alcohol na Aruba ta yegando na nivel preocupante, pa basta tempo esaki a wordo treci dilanti manera Halley a sigura, su persona como dokter tin hopi aña tratando problemanan di adiccion y alcohol cu ta un problema grave, por a mira tambe como un compania tabata regala un caha di cerbes si un persona ta wordo vacuna, “e nivel di negacion pa alcoholismo y e One Happy Island ta enorme”.

E slogan aki ‘One Happy Island’ segun loke Halley a sigura no ta bon pa un comunidad, e ta bon pa turismo pero no ta bon pa comunidad y ademas di esey tin instancianan cu ta promove consumo di alcohol.

Un ehemplo di esaki, ta tur medidanan cu a wordo implementa pa loke ta trata pandemia di Covid-19, na unda barnan a keda habri pero ley seco no a wordo implementa, “eynan bo ta wak cu den loke nos ta yama psicologia profundo, ta duro pa un hende wak su mes, ta duro pa gobierno wak su mes y tambe ta duro pa sector wak su mes, pero lo cual nan no ta keda wak tur ora ta cu e alcohol nunca ta wordo mishi cune”, Halley a comenta.

Esaki por ta un negacion di un adiccion, “e sistema den su totalidad ta adicto” ora un persona adicto e mayoria di biaha un otro hende ta wak’e prome cu e persona mes, “gymnan a wordo cera pero barnan a keda habri”, na unda e comunidad ta bay recuri na un otro tipo di droga pa e nan sentimentonan pasobra ya e persona ta un adicto caba.

Asina mes Hally a expresa cu ora bin un gobierno nobo mester bin un minister solamente pa cuido mental cu ta comprometi y cu berdaderamente ta bay cu un linea di cuido mental autentico den un aliansa fuerte cu remedinan natural, di tera y mata cu no ta bay sconde mas e dolornan di e pashent.

Pa finalisa, el a sigura cu e problema alcoholico na Aruba y su peso ta bin tambe door di colonialismo, e proceso di bira independiente y soberano ta di gran importancia pa e salud mental colectivo, ta p’esey cu comunidad ta usa hopi alcohol y junk food, “tur esey ta colabora y contribui na un pueblo cu no ta contento, di berdad, pasobra bo tin un hospitalidad cu bo ta trata e turista como rey y bo mesun hendenan ta wordo trata manera catibo”, Halley a declara.