Manera a keda sigura den un ultimo conferencia di prensa di Gobierno di Aruba, flexibilisacion di medidanan no tin relacion cu loke ta trata campaña politico, segun prome minister Evelyn Wever-Croes a sigura.
Tocante e decisionnan tuma pa Crisis Team for di siman pasa y cu a wordo anuncia dialuna ultimo, el a indica cu medidanan a wordo flexibilisa pa motibo cu e casonan positivo pa Covid-19 ta bao di 100, situacion na hospital ta bao control y vacunacion ta aumentando.
“Esey semper tabata e tres criterio cu nos tabata usa pa scala medida of pa baha medida” mester tene na cuenta cu e medidanan cu nan ta aplicando segun prome minister a menciona ta bay hopi leu y cada tres dia nos tin cu evalua na unda nos ta para cu nan.
“A dal e casualidad cu ta e mesun tempo di campaña pero esey no tin haber cune”, el a sigura.
Manera a keda conoci, campaña politico ta tumando luga keto bay cu e mesun tradicion di ultimo añanan, bishita na cas, canamento den barionan, ponemento di bandera y pegamento di sticker, un situacion cu comunidad mes mester ta hopi cauteloso na momento cu esaki lo tuma luga mirando cu casonan di Covid-19 ainda ta existi na Aruba.
Asina mes, prome minister a indica cu nan ta bezig cu un rapport na unda nan por haya sa kico ta stroba hende pa bay vacuna, pa asina nan por soluciona esaki pero cu te ainda nan no tin e resultado di e rapport aki.
