(EFE) – Canciyer di Colombia, Claudia Blum, a presenta su carta di renuncia na e presidente Ivan Duque na momentonan cu e pais ta hundi den un di e mayor crisis social y politico den su ultimo añanan y cu tin mas di dos siman di protestanan y mobilisacion.
“Via e carta aki, di e manera mas respetuoso mi kier presenta na abo mi renuncia irevocabel na e funcion di minister di Relacionnan Exterior, cu ta efectivo di manera inmediato”, e carta tabatin e fecha dia 11 di mei, pero a keda conoci ayera.
Desde 28 di april ultimo Colombia ta bibando importante y multitudinario protestanan ciudadano cu a cuminsa cu e rechaso pa e reforma tributario cu a wordo elimina caba y cu Gobierno tabata kier aproba, pero awor ta enfoca riba otro reclamonan como reforma di polis, un reforma di salud, y tambe e renuncia di e presidente.
Blum, cu tabata den e funcion for di november 2019 ora el a reemplasa Carlos Olmes Trujillo, cu a fayece na januari di e aña aki, no a duna motibonan di su renuncia, cu tabata core como rumor na algun medionan nacional desde fin di siman ultimo.
“Mi ta sigur cu, bao su liderazgo, e pais lo sigui cu e desaroyo sostenibel, recuperacion social y economico, frente e efectonan di e pandemia, y den consolidacion di e consenso cu ta rectifica unidad y fortalesa di nos nacion”, Blum a bisa den su carta.
Ministerio di Relacionnan Exterior mester a enfrenta e multiple criticanan y yamada di atencion den ultimo dos siman di parti di organismonan internacional, ONU y paisnan stranhero riba e potretnan di e brutalidad di polis cu a keda conoci pa henter mundo.
