Segun resumen di ayera di Departamento di Salubridad Publico DVG pa loke ta trata e desaroyo di pandemia di Covid-19 na Aruba, ayera a registra dos morto mas pa e malesa, loke ta trece e total di fayecido na 104.
Un dia prome e cantidad di morto a aumenta cu un persona, di 101 na 102. Y ayera a conoce dos morto mas, aumentando e cantidad di 102 na 104. Condolencia na famia y sernan keri di e fayecidonan.
Den otro informacion relaciona cu e pandemia di e virus SARS-CoV-2, DVG a informa cu 9 persona a recupera di e malesa, mientras a registra un total di 13 caso nobo di Covid-19. Di esakinan, tur ta residente. Cu esaki e cantidad di caso activo ayera a keda na 95 persona.
E cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 670 test. ‘ e tasa di positividad (‘positivity rate’) entre residentenan ta 10%.
Di su banda, hospital Dr. Horacio Oduber a informa cu tin un total di nuebe persona interna pa ricibi tratamento pa Covid-19. Di esakinan, 4 ta den Unidad di Cuido Intensivo ICU, mientras cinco ta isola riba unidad general di covid.
