Ningun instancia kier asumi responsabilidad, pero mientrastanto, a roza y pone trailer pa biba sin cu un hende por duna cuenta

No tin transparencia den otorgamento di tereno. Bon Dia Aruba tin algun siman ta trata di haya informacion concreto di DIP riba e pregunta, con un persona por a djis pone un trailer riba un tereno domein sin cu esaki a keda otorga. Ta trata di un caso na Bringamosa, net banda di un area residencial.

Residentenan di lunanan ta haciendo e mesun pregunta na DIP, esta si e tereno a keda otorga formalmente y inicialmente, e contesta di DIP tabata di sorpresa. Esta cu ningun hende den e departamento di Infrastructura y Planificacion sa algo di e tereno en cuestion y cu nan lo a investiga. A bay varios carta pa DIP y e Director, pero nunca a haya contesta. Despues a acerca Bon Dia Aruba.

Falta di transparencia na DIP

Mescos cu e residentenan di Bringamosa, a acudi na Kadaster unda a keda verifica cu e tereno ta di Gobierno y no tin ningun number riba dje cu ta nifica cu e no a keda otorga na ningun hende. Riba e pregunta con por ta cu a roza e tereno y a pone un trailer riba dje, e contesta tabata cu mester haci e pregunta ey na DIP, pasobra no tin mucho comunicacion entre e dos departamentonan aki. Kadaster generalmente ta haya e informacion te na ultimo for di DIP, ta locual a informa nos.

Bon Dia Aruba a drenta den contacto cu Director di DIP. dr. Haime Croes kende a bisa cu e ta pendiente e con leu e seccion di control di DIP ta y no a contesta mas.

Di otro banda, Robert Maduro di e seccion a bisa Bon Dia Aruba cu nan ta apenas dos hende cu dificilmente por controla tur luga. Maduro a bisa cu tabata ex Minister Marisol Lopez Tromp cu den e par di lunanan cu e tabata encarga, a haci un trabou di duna tereno di huur na cantidad, particularmente na su sostenedornan. Robert Maduro a menciona specificamente e area di Calbas. Pero Maduro no por a specifica si e tereno na Bringamosa a keda priminti na un hende di Marisol.

“Peticion ta den proceso”

E bisiñanan na Bringamosa tabatin mas informacion unda te hasta a tende cu aki ta trata di un cas pa uzo den fin di siman so y cu por tuma contacto cu City Inspector. City Inspector Kevin Peterson tabata sorprendi cu a referi na su persona, y e mes a bay wak e trailer y tereno, y informacion cu DIP a dun’e ta cu “e peticion pa e tereno di huur ta den proceso, pero ainda no a otorga esaki.” E informacion cu City Inspector a ricibi ta contrario na locual Bon Dia Aruba a haya di splicacion, esta cu “nos no sa nada.”

E ta un situacion hopi straño, pasobra ta trata di un pida tereno relativamente grandi, cu a keda roza. Y pa roza un tereno di huur, mester di e asina yama aanlegvergunning cu DIP ta duna. Pero manera a bisa caba, DIP no tabatin mucho informacion pa duna n a Bon Dia Aruba. Un persona familiar cu trabou di DIP a bisa cu ta bin un problema acerca, esta cu pa DIP por actua, mester topa cu hende ta roza na e momento. Pues ‘op heterdaad.’

Trailer mester di bouwvergunning

Asina mes, e Algemene Politie Verordening, APV, ta duna autoridad, den e caso aki, Polis pa tuma paso. Pues den caso cu DIP ta haya cu hende a tuma un tereno di Gobierno sin mas, por yama polis. Polis tambe por actua riba su mes, basa riba articulo 15 di e APV.

Otro partner den henter e cadena aki ta DOW. Segun Rubin Ponson di DOW, ta permiti pa pone un construccion of un asina yama ‘opstal’ riba tereno di huur, cu ta destina pa warda material. No ta e intencion pa un tereno di huur, cu ta duna pa cria of plantacion, cu ta pone un trailer pa hende biba aden. Asina cu e ta un vivienda, ademas, e ta rekeri bouwvergunning. Y for di tres siman pasa, DOW a palabra cu polis cu asina ta mira transporte di e trailernan aki, ta acerca e doñonan pa mustra cu nan mester di bouwvergunning. “Si un trailer pa biba ta bay riba tereno eigendom, e vergunning ta sali hopi lihe. Si ta trata un tereno erfpacht, e lo por tuma mas tempo, pero lo por haya vergunning pa por pone un trailer. Sinembargo, e ta diferente pa un huurgrond cu ta destina pa plantacion of cria di bestia,” Ponson a bisa Bon Dia Aruba.

Riba e pregunta con e ta posibel cu ta laga hende pone un trailer grandi riba tereno publico, sin cu ningun instancia por duna claridad cu a otorga e tereno den forma debido, e situacion ta complica. Pasobra DOW ta e instancia cu por yama atencion y duna instruccion pa kita e trailer. E problema ta cu esun cu mester kita e trailer e ora ta e doño di tereno cu ta Gobierno y DIP ta actua na nomber di Gobierno. “Pues, DOW lo mester bisa DIP y DIP mester duna instruccion. Pero si DIP no ta duna instruccion, DOW no por haci nada mas,” Ponson a bisa.

Tereno publico ta keda problematico

Tin un dos ex Minister di Infrastructura bou investigacion. Es mas, hasta AVP tabata campaña na 2009 cu ‘busje komt zo,’ como critica con ex Minister Marisol Lopez Tromp tabata hiba maneho di otorgamento di tereno, cu a culmina cu e ultimo dia di e Gobierno demisionario di MEP, a core firma pa desaroyadornan di Ritz Carlton haya un tereno. Pero AVP nunca a haci e investigacion y awe e partido ta luchando cu e investigacion penal Avestruz cu ta riba e forma con a hiba maneho di tereno publico.

E Gobierno actual tampoco ta liber di sospecho. Un ex miembro di Gabinete Wever Croes ta sospechoso den caso Flamingo. Otro investigacion riba otorgamento di tereno. Ironicamente, Marisol Lopez Tromp a uni na e denuncia, y e Gabinete a dicidi cu e no ta cuadra nan den maneho y nunca a denuncia of distancia di caso Flamingo.

E Minister cu a tuma e cargo di Infrastructura, pues otorgamento di tereno ta e propio Prome Minister Evelyn Wever Croes, cu a bisa cu el a sinti cu Marisol Lopez Tromp tarda cu otorgamento di tereno di huur cu a stroba e desaroyo economico den un periodo cu mester mas actividad.

Comision di Control

Bon Dia Aruba a tuma contacto cu drs. Marisol Lopez Tromp riba e tereno na Bringamosa, y el a bisa cu e no sa di nada. E ta refuta e acusacion di controlado di DIP, esta Sr. Robert Maduro cu e lo a yuda su sostenedornan cu tereno. Al contrario. Locual el a haci ora cu el a asumi e cartera pa algun luna, ta haci un inventario y laga tur hende bolbe haci peticion pa tereno di huur via e website di DIP. Y tur mester a cumpli cu condicionnan stricto. “Nos a lanta un comision di DIP, DOW, Cuerpo Policial, City Inspector y hasta Santa Rosa, pa controla si berdad ta cumpli cu e condicionnan pa haya e tereno domein pa plantacion of cria di bestia. E comision ey ta basa riba un Decreto Ministerial cu ainda ta valido, pues ainda nan tin e tarea pa actua ora ta nota cu algo no a cana bon,” Lopez Tromp a señala.

Precedencia

En todo caso, e ehempel di e tereno na Bringamosa cu su trailer pa biba ta ilustra ora cu no tin transparencia. A puntra Rubin Ponson di DOW y Robert Maduro di DIP kico e caso aki ta ilustra. Pasobra cualkier hende cu djis haci un peticion pa tereno di huur y sin haya ni sikiera notificacion cu e ta aproba, por roza tereno y tuma posesion di tereno publico, sin mester tin preocupacion pa consecuencia. Ningun por a contesta. Y preguntanan na Director di DIP tambe a keda sin haya contesta.

En todo caso, e ehempel di e tereno na Bringamosa cu su trailer pa biba ta ilustra ora cu no tin transparencia. A puntra Rubin Ponson di DOW y Robert Maduro di DIP kico e caso aki ta ilustra. Esaki ta pasa tambe na Butuco. Pasobra cualkier hende cu djis haci un peticion pa tereno di huur y sin haya ni sikiera notificacion cu e ta aproba, por roza tereno y tuma posesion di tereno publico, sin mester tin preocupacion pa consecuencia.

Un situacion real cu ta muestra di un maneho no optimal nos ta haya na nos ruman isla Corsou, caminda cu e maneho dejado a conduci na barionan cu a wordo lanta ilegal sin ningun gobierno por a stop esaki, cu tur su consecuencia di desorden y ilegalidad na gran escala cu te awe Corsou no por caba di controla. E la yega te na e extremo caminda persona nan indocumenta a lanta nan propio colonia di casnan ilegal construyendo casnan ilegal sin cumpli cu ningun regla. P’esey, awe nos ta duna atencion na e situacion aki prome cu situacion sali for di man y bira un problema nacional. Te awe, ningun persona por a contesta, y preguntanan na Director di DIP tambe a keda sin haya contesta