Segun Anchelino Vrolijk candidato di partido POR: Ricardo Croes abiertamente ta comete un strafbaar feit cual ta consumo di cannabis

Den dianan aki, por a mira cu campaña politico ta tumando forma conhuntamente cu declaracionnan di e mesun candidatonan, y asina varios biaha ta bin dilanti e palabra ‘Integridad’.

Den un entrevista cu Anchelino Vrolijk, candidato number dos riba e lista di partido POR, Bon Dia Aruba a haci algun pregunta naa su persona, cuminsando for di kico ta Anchelino su opinion tocante integridad y con importante esey ta pa su persona, no solamente como politico sino como un persona cu ta un docente den funcion.

Pa esaki, Vrolijk a expresa cu integridad ta algo cu sumamente importante, “specialmente na momento cu nos ta papiando ora ta anhela pa un funcion publico y cu mester duna ehempel na otronan”.

Ora ta papia di integridad, hasta den su profesion como maestro, el a bisa cu ta importante pasobra no ta existi cu un por privilegia un alumno riba otro.

Na mesun momento, a wordo treci dilanti cu diabierna ultimo 7 di mei tabata un momento historico den cual dos partido politico a entrega nan lista di candidato siendo cu tin dos sospechoso penal, a puntra ki Anchelino ta pensa di esaki.

“Cada persona cu por ta sospechoso sin cu tin zware feiten riba mesa, no por wordo crucifica zomaar”, asina mes el a indica cu cada caso of acusacion lo mester cana su caminda legal y laga e departamentonan concerni yega na e conclusion.

E mesun diabierna ultimo, den un declaracion den bibo pa Bon Dia Aruba Anchelino a menciona cu un persona “ta inocente te ora lo wordo declara culpabel den corte” , a wordo puntra si esaki ta nifica cu cualkier sospechoso penal na e momento aki por subi riba un lista politico.

Den su declaracion, Vrolijk a sigura cu un persona cu tin un sospecho riba su persona pa cualkier tipo di delito lo mester por sa si e ta berdad of no, “na momento di ta kere den su inocencia y por demostra esaki, e persona aki lo mester por postula su mes. Ademas si personanan ta kere den su inocencia e lo mester por postula su mes”, el a afirma.

“Si en caso un persona wordo condena via un strafrechtelijke process y haya un castigo e persona aki no lo por sigui den politica”, Vrolijk a manifesta.

Na mesun momento, el a trece dilanti cu den e gabinete Wever-Croes “tin un miembro di parlamento cu abiertamente ta comete un strafbar feit, lo cual ta consumo di cannabis,” referiendo na lider di partido RED Democratico Ricardo Croes y cu segun el a sigura, te dia di awe esaki ta contra ley, “pasobra na momento cu nos ta papia di integridad, e persona aki nunca lo a mag di wordo nombra como miembro di parlamento”.

Ademas, Vrolijk ta señala cu ta di suma importancia pa revisa e huishoudelijk reglement di parlamento y adapt’e na unda cu mester, cu na momento un persona por ehemplo, haci su mes culpabel na un strafbare feit, “e lo mester wordo poni den bullpen y nombra un sucesor pa e trabao por sigui”, Vrolijk a enfatisa.

“Pa e motibo aki mi persona ta kere completamente den e inocencia di nos Lider di Partido, pero alabes ta keda critico riba tur cos cu por bin. Pasobra mañan ta pueblo ta pone nos y pueblo ta kita nos”, el a bisa.

Asina mes, Vrolijk a destaca cu ta existi hopi ‘grijze zone’ unda un hende por cana aden, y esaki lo mester wordo limita of elimina mas hopi cu ta posibel, “nos pueblo kier wak politiconan integro y honesto. Y e dos cosnan aki no por wordo cumpra”.

Pa Vrolijk, integridad ta un tema cu conoce un nificacion basta amplio, pa e motibo ey mes “ta di suma importancia pa kader in kico si y kico no ta cay bou integridad. Vooral pa nos politiconan na Aruba, esaki ta conta pa mi persona tambe, pasobra na final di dia nos ta esun cu mester duna e ehempel na comunidad”.

Pa e motibo aki, su pensamento ta cu lo mester revisa e huishoudelijk reglement di entre otro, parlamento hunto cu e gedragscode y adapta esaki unda cu esaki ta necesario, ademas di esey traha conhuntamente cu Bureau Integriteit pa asina por elimina loopholes cu ta existi den ley haci e documentonan accesibel pa publico pa asina publico por lesa y interpreta kico ta cay bou integridad.

Por ultimo su mensahe di integridad na su sostenedonan y personanan cu kier pone su confiansa den partido POR, Vrolijk a bisa cu: “Esunnan cu conoce mi sa cu honestidad pa mi ta algo hopi importante, Ademas biniendo for di e mundo di entre otro, compliance y anti-moneylaundering y pa e ultimo 10 aña como maestro, integridad pa mi ta un tema cu semper nos lo tin cu traha riba dje. Pasobra integridad no ta unicamente un persona cu por comete un strafbare feit, pero integridad ta cuminsa caba na e persona cu ta papia mentira riba un otro pa su propio beneficio”.

“Ora cu nos papia di integridad, nos tin cu cuminsa den nos propio cura pa asina demostra cu bo mes ta integro, p’esey mes mi lema riba e tema aki: walk the talk and practice what you teach”, Vrolijk a finalisa.

Bon Dia Aruba tambe a tuma contacto cu Ricardo Croes lider di partido RED Democratico pa haya sa su opinion tocante e declaracion cu Vrolijk a trece dilanti, pa cu esaki Croes a menciona den un conferencia di prensa di e partido mes cu na 2017 nan a hiba un campaña fuerte contra corupcion, pero 45 mil hende a vota pa e tres partido grandi cu na e momentonan aki ta bao investigacion, “no ta partido RED Democratico, no ta minister Lampe”, Croes a sigura y ademas a enfatisa cu di integridad ni un hende por ‘touchnan’ cu nada y cu e unico persona cu a pasa su screnning ta minister demisionario Armando Rudy Lampe.

Treciendo dilanti e declaracion di Vrolijk, Croes a bisa “mi kier sa cuanto gana bo tabatin pa join partido RED Democratico, pero despues cu bo no a logra bo a bay haci declaracionnan over di mi persona, cu mi persona no ta integro pasobra mi ta huma cannabis y mi ta den parlamento, bo no tin e caliber.”

Asina mes Croes a señala cu e unico cos cu Vrolijk “a presta su mes pa haci ta pa reclama sr Lampe y despues bin colga y wak si bo por haya un chens, bo no tin berguensa y bo sa dicon? Pasobra bo ta un sinberguensa, nada otro” Croes a contesta.

Croes ta menciona cu uso di cannabis nunca tabata ni ta prohibi, no tin ni un ley cu ta prohibi e consumo, loke e leynan ta prohibi ta e produccion, transporte, benta, y lo cual Vrolijk ta bisa di loke ta trata e hecho cu e ta un parlamentario ta un prueba palpable di su mentira, di lo contrario e nunca por a bira un parlamentario si e tabatin e rason, segun Croes a sigura.

“Esaki ta wordo declara publicamente den parlamento y pafo di parlamento cu mi ta un consumidor di cannabis, p’esey mi ta un activista, p’esey e ta den acuerdo di gobernacion y p’esey mi a hib’e den politica” Croes a comenta.

Di mesun manera, el a expresa cu Croes no ta e unico persona cu a hiba e legalisacion di cannabis na politica, “na aña 2017 tur partido politico tabatin activista pa cannabis, cu excepcion di un so cu ta partido CURPA, esey ta e berdad” Croes a enfatisa.

Asina mes, el a puntra pa Vrolijk “kico lo a pasa si e candidato Geerman di su mesun partido lo a saca un asiento, bo lo a reclama na su lider na e tempo ey cu tabata Otmar, pa no permiti cu e candidato ey lo por a bira parlamentario?” y cu e lider di awor Howell “tabata parti propaganda politico pa discriminalisacion di cannabis”.

Pa finalisa, Croes a sigura cu e pais aki “no por continua cu partidonan politico corupto, oportunista, traidor”